sempama jaku iban

SEMPAMA JAKU IBAN

1.”Kunchit di tisi langit di asu,rusa di kaki tangga enda di emparu”

RETI: Rindu tauka kelalu deka kiruh ngereja pengawa ke enda menuku tauka nadai ngenatai ke penguntung ba menua ti jauh ,tang pengawa ti menyana tauka utai ti endang udah ditemu nguntung ke diri empu ba endor ti semak, enggai kiruh ngereja ia.

2.”Baru ngelangkah sesingkang udah bekalau panjung neratang ka diri menang”

RETI: Urang ke sumbung madah ke diri lebih ari orang bukai taja pan utai diulih iya mimit aja lebih ari orang bukai.

3.”Manjung di pala wong”

RETI: bedau belaban tauka betanding dulu madah ke diri udah menang.

4.”Baka tapang diwan rembia, baka lubuk diwan baya”

RETI: madah ke siko-siko orang indu udah bisi orang empu tauka bini orang.

5.”Baka remaung di rumah, baka raung di tanah”

RETI: Urang ti regas tauka kering di rumah tang ngereja pengawa di tanah nadai endar pengering tauka utai ulih.

6.”Banyak tai badak, mayuh tai nyumboh”

RETI: Bala tubuh aja mayuh leboh ngereja utai tang utai ulih enda ngipak ke pemayuh tubuh.
 

7.”Mang Tulang”

RETI: Orang ti selalu madah kadiri bisi pemedis/sakit enti leboh bisi pengawa dikerja. Iya ke bendar iya enggai gawa tauka ngelusu.

8.”Bisi niki pinang, bisi niki nibong”

RETI: Besiping atur/adat ,tauka enda adil/betul magi /mutuska pengawa.(kitai endang sama nemu,batang nibong tu endang utai ti mar tauka pedis di tiki laban ia endang beduri,tang meh batang pinang tu lamus@enda beduri lalu ia pan nyamai agi di tiki.

9.”Tuai Pala Upa”

RETI: Disema ke kitai ngaggai siku-suku tuai@pemimpin ke kelalu lembut tauka nadai penamu serta enda patut mangku pengawa tuai.Kira ke tuai ambi ke syarat aja meh nya.

10.”Baka pipit ti deka nelan buah embawang”

RETI: Disema ke ngaggai urang ti ngembuan juluk ati ti besai ,tajapan iya endang nemu utai nya endang enda ulih di kerja .

11.”Besai Tai laut”

RETI: Besai tuboh tang kurang pengering ngerja pengawa.

12.“Injau Kara”

RETI: Nginjau utai urang tang enda dianjung pulai agi.

13.”Mang ari kepayang rendam sepagi”

RETI: Bisa jako didinga orang maioh.
Chunto :- Leka jako ajar ke dipansut ka aya tuai rumah leboh maia Gawai ngenang ulah nembiak diatu mang ari kepayang rendam sepagi. Sekumbang udah gawai nya bala nembiak bisi bendar berubah tingkah laku diau ba rumah panjai.

14.”Pemangka Gandong Perahu”

RETI: Endor ngelepas ka penyalah.
Contoh:- Kasih meh tudah Apai Sahibnya, baka pemangka gandong perahu.Semua penyalah diserah ngagai iya magang tajapan ukai penyalah iya.

15.“Ditelan mati indai, di lua mati apai”

RETI: Enda ulih mutus ka runding. Kin sah, kitu pan salah.

16.“Alah nyadi abu, menang nyadi arang”

RETI: Belaya nadai ngenatai ka penguntong.

17.”Baka kenyulong mabok keroh, baka empalekong mabok amboh”

RETI: Ngetu, tebalengga enda lama.

18.”Deka ka guni, enggai ka beras”

RETI: Deka bebini indu janda tang enggai bempu anak iya.

19.”Untong nemu beliong enda ngamboh, untong lajong enda ningkoh”

RETI:- Bebini tauka belaki baru enggau orang ka udah bisi anak ka pandai, kerja ke besai pangkat etc.

20.”Baka Burong Pipit ke deka nelan buah embawang”.

RETI: Kelalu besai ati. Pengawa ti deka dikerja ukai setimpal enggau pengering tauka pengelandik iya.

21.‘Mati enda ulih di kerari,Parai enda ulih di ka enggai’

RETI: Pemati kitai mensia enda baka pemati matahari – mati malam, idup siang.
lalu pia mega pemati kita mensia enda baka pemati bulan – mati siang, idup malam.

22.”Gerah mata undang”

RETI: Baka orang indu ti jinak bendar enggau besulu … tang enti kitai nyau keran deka ka iya, iya lalu beguai nyurut ka diri.

23.”Angkat Engkerawai”

RETI:  Dikena madah ke orang ti angkat sareta bebala mayuh.

24.”Belakang bungkuk diasuh ngema pintu, lengan singkung diasuh ngenyan alu

Reti: Orang ti nadai penemu nya diasuh ngereja pengawa.

25.”Kijang nyungkah punggu rebah, kijang manjung punggu pumpung.”
Reti: Apin kitai ngaga penyalah, apin ga orang bulih penusah, lalu enti laban kitai orang enda kena penusah.

26.”Nadai runggang baka pededang mata keti, nadai lilih baka benih padi wi.”Reti: Atur ti enda bechiping tauka enda ngari ari sepiak-sepiak.

27.”Di Rajang baka Lundu, din baka ditu.”
Reti: Enti endang ngelusu di menua diri, di menua orang pan baka nya meh, merinsa ngidup ke diri.

28.”Buah ubi laun di kali, bubuk di pun, buah empasa laun diempa lunggar taun.”

Reti: Penemu tauka pengelandik ke dikembuan siku-siku mensia enti enda dipekunsika enggau orang bukai nadai mih guna. Penemu / pengelandik nya deka lenyau enti orang nya tadi nadai agi.

29.”Udah ga arok, pukong enggau along. Udah ga laboh, tinggang ga lesong.”Reti : Udah merinsa ditambah pemerinsa bukai.

30.”Udah ga jai, belabong luli. Udah ga chelum bersimpai kuntu.”
Reti : Udah merinsa ditambah pemerinsa bukai.

31.”Baka enseluai nangkap ludah”Reti : Bedau abis urang bejako udah di reboh/ dilampat.

32.”Baka Baya ditegah indu.”Reti : Pinta Ngenyit

33.”Baka Kepayang ngada ka dilah”Reti : Urang semina ngeluar ka jako aja tang iya empu enda ngereja pengawa.

34.”Manok lepas jari bau tai.”
Reti : Utai udah tentu bulih tang laban enda berjimat utai nya tau terlepas ari jari kitai.

35.”Semalau nampong lachau, tawak nampong begau.”
Reti : Berita ka bedau pasti/ terang tang udah ditampong bala maioh.

36.”Nubai sungai enggau Lia, nebang tapang enggau lungga, nimba perahu enggau tapa, nanjak wong enggau penimba.”
Reti : Ngereja pengawa enda enggau patut.

37.”Kumang menyarung”Reti: Nyaru diri nyadi orang bukai.

38.”Ika lelengga ikan enda ngaban, kudi ari enda hujan.”
Reti : Baka lelaki ke bisi ati ka siko indu dara tang indu nya nadai kiroh tauka iboh ka lelaki nya.

39.”Cit bekutu, mayau betebu”
Reti : Sama reti enggau “Rara Brunei” – ngator orang tang bisi berat sepiak. (Aum juak)

40.”Baka idung antara mata”Reti : Enda berat sepiak

41.”Raung ngalih” Reti : Pengidup kitai enda selalu tusah, bisi maya penyenang deka datai

42."Baka ular matak silui”

Reti : Orang ke lubah bendar ngereja pengawa.

43.”Baka ular ke udah nyilui”

Reti : Ular enti baru udah nyilui sigi agi pedis serta nadai pengering. Iya lembut lalu suah bendar ulih diempa jelu bukai dalam babas laban enda ulih ngerari ka diri. Kitai mensia enti disema ka orang baka ular baru udah nyilui reti nya pedis isi, baru gerai sakit serta nadai pengering.

44.”Baka kumang ke nupi ular sawa”

 Reti : Orang ke enda nemu beterima kasih ngagi orang ke udah nulong serta ngidup ka iya,

45.”Nyamai pantuk beluai ari ditelan sawa”

 Reti : Enti kita bisi ngereja penyalah manah agi kitai ngaku salah serta minta ampun ari kitai ditinggang hukum tauka adat.

46.”Telan sawa enda terpanggai, tangkap kamba nadai endor mulai”

Reti : Orang ke bisi berasai malu nerima tolong ari orang leboh iya bisi penusah laban iya ingat ka diri empu jarang serta enda kala meri tolong ngagai orang bukai.

47.”Rari ke ribut tetemu ke ujan, rari ke sungkup tetemu ke pendam”

Reti : Nya utai ti di kenggai, nya ga utai ti datai(nyadi)

48.”Baka perau nganta ke pengkalan”

Reti : Sempama urang ke baru belaki bebini, maia ti baru datai di rumah entua, cukup pemanah, cukup rajin ngereja pengawa. Tang nadai lama aja

49.”Menyadi perut jani, kaban perut ikan”

Reti : Urang ke deka bekaban lebuh maia kitai senang ajak. Enti udah maia di tuntung penusah, nadai ia ibuh agi

50.”Duruk bubut seduai ruai”

Reti : Ngereja pengawa beduruk enggau pangan diri enda enggau ati ti lurus/enggai ngereja ia manah( iya ke enda lurus nya,burung bubut,burung ruai lurus enggau bubut)bisi dlm bup ensera Iban

51.”Bulan begantung senduk”

Reti : Suntuk@ rapas belanja

52.”Baka ke meda balak entua”

Reti : Tegenung/tegepang/tebelenga/enda tepansut ke jaku/deka ngelara serba salah(utai baka tu suah nyadi laban urang. kelia ke agi besirat) taja pia kitai enda kanji baka sekeda bansa

53.”Baka ular ke matak silui”

Reti : Lembau,semadi ka angkat ngereja pengawa

54.”Asai ke betangas”

Reti: Naka pengangat

55.”Asai ke diau dibaruh punggu”

Reti : Semampai irau ati laban penusah tau datai sepanjang maia

56.”Asai ke dibuai empeleman”

Reti : Berasai nyamai bendar, nadai pedis agi.

57.”Asai ke dipandam dada”

Reti : Tekenyit, kesal amat ati

58.”Asai ke enda ngindik tanah”

Reti : rari empa penakut iya. enda berasai singkang kaki, nyau ka tesipak ke urat kayu.

59.”Asi disungkit sapa enggai makai”

Reti : sapa-sapa pan enda nulak enti pemakai udah di nah ka.

60.”Baka amau di puchuk tuga”

Reti : Enda entap. baka amau, sebarang maia tau terebai dibai angin laban ke alus bendar.

61.”Baka Bala anak impun”

Reti : bala anak ke agi mit, nampung burit indai sida ia, lebuh mindah kin kia. Endang enggai jauh indai

62.”Baka api ke dipanjah ai”

Reti : padam tekala nya. badu bemunyi.

63.”Baka beliau bedua iku”

Reti : nelap amai. enda sayau ke utai.

64.”Baka mulung, sepeneka ngaga. Dilinut tau, ditumpi pan tau”

Reti : Ni ko urang aja meh. enda nemu mantah

65.”Baka ke nanya laut bira”

Reti : ditanya tang enggai nyaut, nyangka bisi utai dikeringat ka kini

66.”Baka Kilat ngelambai petang”

Reti : jampat amat ngereja utai

67.”Baka pitak dibuai mata”

Reti : urang ke nadai daya agi udah ti kena tinggang penusah

68.”Baka tekura ke ngirit kerubung”

Reti : Madah ke pengelubah bejalai urang siku-siku

69.”Bekerendut dada”

Reti : meda aja tang nadai ati deka nulung

70.”Belah Pauh”

Reti : Empa pengelebat ari ujan

71.”Belah rutan”

Reti : Sama penguat, sama pengering. Enda tealah ka pangan diri

72.”Bemayau gila”

Reti : jaku kelaung ‘ngayap’

73.”Bengkak Jari”

Reti : bepenti laban bini benung ngandung

74.”Berani Babi”

Reti : Berani enggau nadai akal. ‘hentam’ aja

75.”Berani Kesa”

Reti : Enda tentu nyengala berani

76.”Berat jari”

Reti : ngelusu, kelalah.

77.”Berat tulang”

Reti : berat jari = ngelusu, kelalah

78.”Beseling kain”

Reti : Nadai penemu ba senentang siti-siti pekara.

79.”Bingkuk batang empasa, lurus ulu lungga”

Reti : pengawa meri ukum berat sepiak, beciping

80.”Bisi niki nibung, bisi niki pinang (benibung, bepinang)”

   Reti : beciping

81.”Buai batu”

Reti : enda ingat ke pangan agi

82.”Bula enggai”

Reti : jaku ti madah ke diri enggai tang dalam ati, deka

83.”Bulan begantung senduk”

Reti : suntuk bendar, enda cukup pemakai.

84.”Buntak pulai buntak”

Reti : pulai puku, enda untung, enda ga rugi.

85.”Buyah ngerejah api, manuk ngerejah taji”

 Reti : nganjung paung empa jani

86.”Idung antara mata, dilah antara nyawa”

Reti : penemu tengah-tengah. nadai nanah ka sapa-sapa.

87.”Kair pantuk baka manuk”

Reti : ulih sarinya, empa sarinya. Pengidup ti tusah. Miskin

88.”Kapal pecah, yu kenyang”

Reti : bulih penguntung ari laya urang bukai

89.”Kembai tali”

Reti : ai ka bisi mansang mimit. Bah ti enda kelalu besai

90.”Kulit ngelamun tulang”

Reti : urang ti kurus amai

91.”Lembut mumban teruju ai”

  Reti : gerah mata undang = baka ti senang diulih, tang enda baka ka disangka.

92.”Mabuk nadai ditumi, ngabang enda diambi”

Reti : nadai tentu tuju ngereja siti-siti pengawa. kiruh bendar tang nadai asil

93.”Malu bekayuh perau anyut”

Reti : enggai kruh gawa, pengidup tusah

94.”Mapa ke rau”

Reti : Bam bendar. baka ke enda kala makai

95.”Maiuh tai nyumbuh, banyak tai badak”

Reti : tubuh aja ke maiuh, tang enda tetembu ke pengawa ka diasuh.

96.”Muka kelambi ngayan ka kurap”

Reti : mantai ka penyai/penyalah/pemalu diri empu

97.”Munyi burung ke makai buah kara”

Reti : ingar amai

98.”Munyi e begawai”

Reti : richah rami

99.”Munyi ke di sampu”

Reti : gut-gut nganu urang enda nemu badu