Ensera Apai Aloi

ENSERA APAI ALOI ( 9 buah ensera )


1. Indai Aloi Abis Garam
Nyadi Apai Aloi tu endang orang ke pintar bejako dalam menoa nya. Tang taja iya pintar bakanya, suah mega iya saru pengawa dikereja tauka saru jako dipansutka ngagai orang.
Nyadi tumu pagi siti, dia Enchelegit Nangga Langit, Enchelegit Nangga Hari, bini Apai Aloi angkat berapi pagi ka sida sabilik. Leboh asi udah mansau, dia iya lalu berengkah mela tubu ka lauk pagi nya. Udah tembu mela tubu nya, dia iya nemu garam sida udah abis.
“Oh, abis garam aku tu,” ko iya bejako kediri berandau nengali. “Nama penyadi tubu tu nadai garam kena ngulai.”
Ninga indai Aloi bejako kediri, dia deh Apai Aloi lalu nanya, “Nama utai dikarandau ka nuan, Enchelegit?”
“Eh! Kitai nadai agi garam kena ngerami tubu tu. Enti nuan deka, manah nuan nemuai ngagai sida indai di Panggau minta garam,” ko Indai Aloi.
“Nama guna enggau garam ?” ko Apai A loi.
“Eh! Dikena aku ngerami paku-tubu, “pia ko saut Indai Aloi.
“Au! Lagi meh aku minta garam,” ko Apai Aloi.
Udah nya angkat iya lalu begari. Pasok ka iya baju bisi charik, pasok ka tanchut bisi rubik. Belit ka labong gari batik. Tangkin duku jungkang tarik.
Udah begari, lalu nurun meh tudah tuai. Nyadi rumah sida mentua iya numbas ga penyauh ari nya. Enda tentu berasai iya bejalai lalu datai. Dia iya lalu niki ka rumah sereta napat ka ruai sida mentua iya, lalu terus tama ka bilik. Iya lalu nudok ka diri di bilik.
“Akai rai! Lelak aku tu bejalai,” ko iya.
“Oh! Nama kabuah nuan bangat ngenumu nya deh, Apai Duat? Nama utai dipeguai ka nuan?” ko mentua iya nanya.
“Es! Nadai kabuah bukai, semina diasoh Indai Duat minta garam kena ngerami paku-tubu,” ko saut Apai Aloi.
“Au, Apai Duat,” pia ko saut mentua iya. Udah nya lalu ditungkus ka mentua iya garam lalu disimpan dalam ma Apai Aloi. “Nya, Apai Duat udah aku simpan garam ba ma nuan,” ko mentua iya.
“Au, manah meh nya,” ko Apai Aloi.
Udah nya iya lalu mulai ka diri. Di rantau jalai iya ke mulai ka diri, dia iya mansa madang paku. Lama iya ngenong dia. “Oh, nya madang paku, tentu paku nya diasoh Indai Aloi gerami aku garam,” ko iya bejako ka diri berandau nengali. Iya lalu ngambi upih ari ma iya, lalu digerami iya madang paku ngena garam nya.
Angkat iya ari nya, lalu datai ba tanjong madang perin rigai, peda iya tubu maioh bendar nyumbok sabelah nya dia.
“Bah! Nya madang tubu! Tentu tubu nya ke diasoh Indai Duat gerami aku ngena garam,” ko iya bejako ka diri berandau nengali. Iya mega lalu berengkah ngerami tubu dia datai ka garam iya abis.
“Nya baru tubu tu masin ila, udah digerami ngena garam,” ko iya bejako ka diri, gaga ati ka pengawa diri udah tembu.
Udah tembu ngerami paku enggau tubu, iya pan lalu mulai ka diri ka rumah iya empu, ari ili Nanga Panggau. Datai iya di rumah sida empu, hari pan nya deka tengah hari. Sereta datai iya lalu tama ka bilik. Ma iya lalu diengkah iya ba tempuan lalu disandih ka iya ba dinding. Meda iya datai lalu beguai meh Indai Aloi nyerungkai ma iya, peda iya upih sarang garam udah puang, semina mimit aja garam bisi lekat ba salepak upih nya.
“Ni garam dibai nuan deh, Apai Duat?” ko Enchelegit.
“Nama utai ditanya ka nuan! Bisi aku bulih garam diberi indai nuan tang udah abis dikena aku ngerami paku-tubu di rantaujalai tadi. Aku ga nitih kajako nuan. Nuan madah ka garam nya kena ngerami paku-tubu,” pia ko saut Apai Aloi.
“Kasih-kasih meh nuan nya deh Apai Duat, enda nemu reti jako. Ukai nya dikena ngerami paku-tubu dalam babas ko aku. Dikena ngerami engkayu kitai di rumah,” ko Enchelegit.
“Nuan ngumbai aku tambap, aku enda tambap. Nuan ke tambap enda nemu bejako. Nuan ngasoh aku minta garam ngagai sida indai nuan di Panggau kena ngerami paku-tubu ko nuan. Nya alai paku-tubu ga digerami aku ngena garam. Tu dikena ngerami daun kayu ga ko nuan. Dini agi bisi garam kena ngerami utai ngemaioh nya?” ko Apai Aloi.
Enchelegit lalu katawa rakah-rakah berunding ka jako Apai Aloi. Udah nya sida sabilik sama makai merarau belauk tubu tabar.


2. Apai Aloi Ngaga Rumah Ari Kayu tebelian
Nyadi sakali Apai Aloi ngaga rumah limas sabuah. Samoa tiang rumah iya digaga ari kayu tebelian magang, lalu ramu bukai bisi mega kayu lembut tang iya bansa kayu ke tegoh lalu enda diempa bubok.
Leboh samoa ramu udah chukup nuntong magang ba endor ke deka alai berumah, dia Apai Aloi lalu nyedia ka diri deka ngentak. Nyadi endor ke deka alai ngaga rumah baru nya enda jaoh ari ili rumah iya ke diatu. Lalu nama endor nya dikumbai Emperan Embawang. Kabuah alai dikumbai Emperan Embawang laban dia maioh kayu embawang tanam Aya Bujang Tuai seduai Apai Keling.
Leboh ke ngentak nya Apai Aloi minta tulong sida Tutong eng¬gau Ngelai ari Gelong enggau bala sida Keling ari Panggau. Orang Panggau enggau orang ari Gelong nulong Apai Aloi ngelama tiga hari berturut-turut. Udah nya Apai Aloi enggau sida sabilik besaup ngaga rumah nya datai ka tembu. Pengelama sida menyanak nembu ka rumah nya kira tiga bulan.
Nyadi leboh ke deka berumah tu Apai Aloi seduai Apai Sumang-Umang endang udah bisi aum sama deka berumah laban rumah sida iya udah kelalu lama lalu patut diganti baru. Apai Sumang-Umang dudi agi ngentak ari Apai Aloi. Iya ngaga rumah enda nampong Apai Aloi tang enda berapa jaoh ari nya, didinga kukok manok. Lalu endor Apai Sumang-Umang berumah iya nya dikumbai Munggu Lensat laban maioh lensat tuboh dia ari leka lensat ke ditikau ka orang Panggau enggau Orang Gellong leboh ke bisi ngetu mansa menoa nya dia pulai sida ke ngembuah lensat.
Nyadi ramu rumah Apai Sumang-Umang tu digaga ari buloh, lalu betiang ka buloh payan magang. Kira sabulan pengelama Apai Sumang- Umang ngaga rumah alai iya tembu.
Nyadi leboh rumah seduai sama udah tembu dia seduai sama bebai pindah, taja pen rumah seduai enda betampong tang seduai deka pindah sama sereta hari lalu ngintai ke maia bulan agi mansang tauka maia anak bulan. Apin seduai iya pindah, seduai dulu ngiga burong ke manah kena pindah.
Udah tembu pengawa nya, Apai Aloi pan pindah ngagai rumah baru iya di Tembawai Embawang. Pia mega Apai Sumang-Umang lalu pindah ngagai rumah baru iya di Munggu Lensat.
Kira sabulan Apai Aloi udah pindah ngagai rumah baru alai iya lalu niri ka gawai Pangkong Tiang. Tang apin iya menyadi gawai dulu iya nanya Apai Sumang-Umang. Pagi siti Apai Aloi lalu nemuai ngagai Apai Sumang-Umang.
Leboh iya datai ba kaki tangga iya lalu ngangau.
“Oh, akan! Jadi rumah nuan?” ko iya.
“Jadi,” ko saut Apai Sumang-Umang. “Niki meh, lalu, dudok kitu.” Apai Sumang-Umang lalu nganchau tikai. Apai Aloi mega lalu dudok.
“Nama pejalai nuan deh, akan, beguai tauka pejalai lantang?” ko tanya Apai Sumang- Umang.
“Au meh, akan, aroh iya nuan nanya ni tau nadai kabuah. Iya ke sama tuai baka kitai tu,” pia ko Apai Aloi. “Aku bejalai nemuai ngagai nuan, ensepi diri baru datai ba rumah baru. Nya alai aku madah ka diri deka begawai Pangkong Tiang lalu enggau gawai Nama ka Tuah. Nyadi ati aku deka mai kitai sama begawai, kitai patut minta ngagai petara awak ka kitai gerai nyamai lalu rumah likun alai diau.”
“Manah runding nuan nya, akan. Aku pan bisi ga ati deka begawai, tang rumah aku diatu apin tentu tembu, agi maioh utai kena ngelagu rumah apin digaga,” pia ko saut Apai Sumang-Umang.
Udah tembu randau nya Apai Aloi mega lalu mulai ka diri ngagai rumah iya di Emperan Embawang. Udah nya iya lalu nyendia ka Gawai Pangkong Tiang.
Leboh gawai nya iya ngambi lemambang, iya nya lemambang ari Panggau, betuai ka Balu Jantau seduai Engkarong Ridan. Apai Sumang-Umang pan sama bisi enggau ngabang, pia mega orang ari Panggau enggau ari Gelong, laban orang deka meda penegap rumah Apai Aloi ke digaga ari kayu tebelian.
Tembu gawai Pangkong Tiang pagi nya, lalu ditampong Gawai Nama ka Tuah iya nya ngangau ka Raja Tuah ke dikumbai Gangga Ganggai ari tasik besai linggang gumbang. Tembu Gawai Nama ka Tuah, samoa pengabang sama-sama mulai ka diri.
Sereta Apai Sumang-Umang udah pindah ngagai rumah baru, iya lalu nebok samoa tiang reraga tanju, kasau enggau pagar manok, pagar babi samoa digaga ka lubang magang, baka lubang kesuling. Lalu di tanju digaga ka iya ayam ribut lalu tiang ayam ribut nya pan lalu digaga ka iya lubang. Samoa lubang enda sabaka bisi besai, bisi mega mit, nya alai leboh hari ribut, rumah Apai Sumang-Umang nya rami bendar laban tau bemunyi baka kesuling ke disepu orang enda kurang ari sapuloh iko sama sereta.
Leboh samoa utai nya udah tembu, nya baru Apai Sumang-Umang lalu niri ka Gawai Pangkong Tiang enggau Gawai Nama ka Tuah baka gawai ke didiri ka Apai Aloi. Nyadi gawai Apai Sumang-Umang nya enda dipengap ka lemambang tang samina nyampi aja, ngangau ke petara tuah, petara limpah. Leboh gawai nya Apai Aloi mega bisi diambi Apai Sumang-Umang ngabang, orang bukai nadai dipadah ka iya.
Leboh Apai Aloi datai ba rumah Apai Sumang-Umang iya mega lalu niki ka rumah. “Oh, lalu akan,” ko Apai Sumang-Umang.
Enda lama udah nya Apai Sumang-Umang lalu mantai ka maioh macham utai diempa. Pia mega Indai Sumang-Umang di bilik din sama mantai ka macham utai diempa, baka penganan, letup enggau utai bukai.
Leboh ti makai utai nya dia Apai Aloi lalu nanya ka pengabang bukai. Ko iya nanya, “Kati ko sida di Panggau enggau sida di Gelong bisi diambi nuan ngabang?”
“Eh! Maioh orang dipadah ka aku, tang sida madah ka diri enda ulih ngabang laban bisi penanggol ke berat,” pia ko saut Apai Sumang-Umang. Tang iya ka bendar, Apai Sumang-Umang nya takut ka rumah diri runtuh ditepan bala maioh laban ramu rumah iya digaga ari buloh magang.
Udah badu makai utai nya tadi dia Apai Aloi seduai Apai Sumang-Umang lalu berandau enggau pangan diri, lalu leboh nya mega hari bisi ribut. Sereta ribut datai dia rumah Apai Sumang-Umang lalu bemunyi munyi kesuling. Ninga rumah tau bemunyi ngemanah nya, dia Apai Aloi lalu lama ngenong. Dinga iya ka tan-ju bisi ga bemunyi, di baroh rumah pan bisi ga bemunyi, pagar babi sama bisi munyi kesuling. Ninga nya seruran bemunyi nadai ngetu dia Apai Aloi lalu nanya.
Ko iya, “Sapa orang nebah utai nya?”
“Eh!” ko Apai Sumang-Umang nyaut, “Bunsu ribut ke nebah nya tang iya enda dipeda kitai laban iya nya antu.” Nya kabuah Apai Sumang-Umang enggai ngambi Lemambang mengap, enggai ka bunyi kesuling enda didinga alah laban nyawa Lemambang ke mengap.
Ninga utai munyi nya, Apai Aloi lalu bejako, “Tuai ga umor aku tu udah tang aku nadai kala ninga rumah tau nyepu kesuling baka rumah nuan tu, akan, lalu kesuling nya pan nadai ga dipeda.”
Udah nya Apai Aloi lalu nanya, ko iya, “Deka nuan nyual utai ke bemunyi nya awak ka aku engkah iya ba rumah aku din.”
“Oh!” ko Apai Sumang-Umang. “Utai nya enggai nyadi di-jual, laban nya udah disimpan dalam tiang din. Nambah ka nya orang bukai nadai ulih nyepu kesuling ngemaioh nya sereta sakali semina bunsu ribut aja ti tau. Lalu aku enda nemu berapa ka rega ribut nya enti iya dijual. Laban Semina Petara aja, enti iya deka, bisi kuasa tau nyual ribut,” ko Apai Sumang-umang.
“Enti iya enda tau dijual, manah tua besilih rumah, rumah nuan pulai ka aku, lalu rumah aku pulai ka nuan,” pia ko jako Apai Aloi.
Apai Sumang-Umang ngaga diri enggai besilih, laban ngaga rumah ke tau bemunyi baka nya enda mudah, ko iya. Apai Aloi nyau bebendar ngumbok Apai Sumang-Umang selemai-lemai nya. Ati Apai Sumang-Umang endang deka besilih, tang iya ke enggai nya endang ngaga diri.
Nyau kelama iya, Apai Sumang-Umang pan deka dibai Apai Aloi besilih rumah. Lalu ko Apai Sumang-Umang, “Aku sayau bendar ka rumah tu, tang samadi nuan meh akan, kitai ga ukai orang bukai.”
Malam nya seduai mutus ka jako lalu tetap besilih rumah. Tiga hari udah nya sida sama berangkut ka reta-tengkira. Apai Aloi enggau sida sabilik ngangkut barang sida ngagai rumah Apai Sumang-Umang, pia mega sida Apai Sumang-Umang sabilik. Leboh samoa perengka udah abis diangkut, pia mega babi enggau manok, sida lalu sama pindah.
Apai Sumang-Umang gaga bendar ati bempu rumah ke manah sereta tegap. Apai Aloi pan gaga mega ati laban rindu ninga tiang buloh ke bemunyi dipuput ka ribut. Lalu leboh maia hari ribut Apai Aloi endang enggai nurun gawa, laban rindu ninga rumah nya ke munyi kesuling.
“Sahari tu kitai menyanak anang nurun gawa, manah kitai diau seraya ke ninga ka rumah kesuling,” pia ko jako Apai Aloi. Nya alai hari nya sida sabilik sama diau di rumah.
Kira dua taun bumai udah nya rumah Apai Aloi lalu chundong laban tiang payan nyau mansang burok. Antara dua tiga bulan udah nya, rumah Apai Aloi lalu tumbang, lalu sida sabilik nadai agi rumah alai diau. Nya alai sida Apai Aloi lalu pulai ngagai langkau umai, lalu dia mega alai sida diau nganti ke bisi awak alai ngaga rumah baru.
Ari langkau umai nya, Apai Aloi enggau sida sabilik mupok beramu laban deka ngaga rumah baru, nambak endor rumah buloh ti udah rebah nya tadi, rumah nya digaga ari kayu tegoh, lalu rumah nya ke alai sida diau lalu ngidup ka diri bumai betaun. Apai Sumang-Umang endang nadai pengirau ati laban rumah iya endang manah sereta tegap.


3. Apai Aloi Nyumpit
Nyadi Apai Aloi tu selalu bendar ngulih ka burong ngena sumpit. lya ke nyumpit nya enda ngena ipoh, tang semina laja aja, laban iya enggai ka burong nya lalu terus mati.
Nyadi sakali, leboh nya maia buah kara nyau mansau di menoa nya, dia iya lalu nurun nyumpit. Endor ke digagai iya nyumpit nya jauh ka dalam kampong puang nadai didinga kesuong nyumboh Bujang. Datai iya dalam kampong dia iya nemu maioh endar kara bebuah ke benong mansau bendar, lalu burong pan maioh makai buah kara. Sida burong sempidan, sengayan pan maioh mega makai buah kara ke laboh ka tanah laban burong bukai.
Dia Apai Aloi lalu berengkah nyumpit. Tang laban iya nadai mai sarang kena mai burong, nya alai iya lalu nanchang kaki burong enggau tali, lalu ditanchang ka iya ba punggong. Burong ke besai pan maioh mega ulih iya, baka kenyali, tekalau, bruie, kejakoh, emperegam enggau burong bukai mega, datai ka tuboh iya nyau penoh laban burong ke ditanchang ka iya. Meda burong ulih iya bengat maioh nya alai Apai Aloi enggai badu-badu nyumpit.Leboh samoa burong ke ditanchang iya ba punggong engkebap ka sayap magang, dia Apai Aloi Ensepi tuboh diri tak begantong an tanah.
Burong nya tadi lalu naban ka iya terebai ka atas kin. Lama agi tinggi agi ga Apai Aloi dibai burong nya terebai. Tang nyau kelama burong pan maioh mega lepas sereta nyau lelak laban pemerat Apai Aloi. Sida pan nyau mansang baroh sebaroh terebai. Leboh sida mansa ba senentang rumah orang Panggau Libau, Apai Aloi pan lalu ngalepas ka samoa burong ka ulih iya nya tadi. Iya pan lalu laboh kabaroh ninggang tugong padi ba tanju sida Keling. Kumang ke benong nyembui padi dia pan lalu tekenyit meda anak mensia tak meredup munyi punggu ninggang bandir laboh ari Langit. Laban ka kelalu kesal di jungkal karong dada, dia iya tak enda berasai lalu engkechit ka dalam rumah lalu megau sida sarumah.
Samoa sida sarumah pan lalu datai begau kia magang, lelaki, indu enggau anembiak meda Kumang nyau kasak-kasak baka ukoi ke nyau anak. Sida ke begau nya tadi lalu pansut ka tanju lalu nanya anak temuai, “Sapa nuan tu tak terjun ari Langit? Anak petara nuan tu?” ko sida nanya Apai Aloi ke agi ngerising nyintak seput nat ka pemedis tuboh diri.
Nyawa Apai Aloi pan nyau rapas ke nyaut, “Iya meh nya, anak petara meh aku tu.”
Ninga iya madah ka diri anak petara, orang lalu beguai nanggong iya ka dalam rumah. Kumang lalu beguai ga beranchau tikai dipanggau enggau diruai.
Genap iko orang ke datai dia sampal nanya iya magang,“Anak petara nuan tu?” ko sida iya agi itok ka penatai iya nya tadi.
“Au, anak petara meh aku,” ko iya.
Lemai nya Keling lalu mai sida sarumah nya baum. Sereta udah tembu makai lemai nya, iya lalu ngasoh bala anembiak lelaki bepadah niti rumah. Bala anembiak nya lalu berebut betesau ngagai tiap-tiap pintu niti rumah Panjai sida Panggau Libau.
“Aya Keling ngasoh kitai sarumah tu angkat ngagai ruai iya,” pia ko sida anembiak nya ngerah sida sarumah.
Enda lama udah nya samoa orang lalu angkat ngagai ruai Keling. Leboh samoa orang udah dudok, Keling lalu bejako, “Aku ngumbai kitai sarumah tu, laban bisi kebuah ke besai. Aku nanya ka runding kitai maioh pasal anak Petara ke bisi nurun ari langit.”
Sempurai lalu nyaut, “Uji kitai agi nanya iya, awak ka nentu ka anak sapa iya nya.”
Kumang lalu nguing nanya anak temuai, “kati nuan tu, amat anak petara nurun ari langit?”
“Iya, anak Petara meh aku tu,” ko iya nyaut, nitih ka tanya orang.
Udah sida sampal ninga iya nyaut, madah ke diri anak Petara, Keling lalu bejako, “Dalam runding aku, manah kitai ninga ka runding aya kitai Nawang Gundai.”
Nawang Gundai lalu bejako. Ko iya, “Iya tu anak Petara. Iya datai ngagai kitai, nurun ari langit. Kenyau ari menya, aku nadai kala ninga tauka meda anak Petara. Nya alai dalam runding aku, iya tu patut disambut enggau gawai. Tu meh baru kitai meda Petara datai segendai ka dalam dunya tu.”
Ninga jako Nawang Gundai munyi nya, samoa orang lalu setuju deka begawai kena nyambut penatai anak Petara. Malam nya samoa sida sarumah nadai tindok laban ngulu anak Petara ba panggau sida Keling.
Tumu pagi siti samoa indu sida di Panggau lalu betutok tepong enggau nyendia ka perengka piring ke bukai. Samoa orang ke lelaki pan sama kiroh mega nyendia ka gawai. Lalu udah diputus ka dalam aum timpoh gawai nyadi. Tiga hari puang ke empat gawai nyadi. Samoa pengabang dipinta datai magang leboh nya. Simpurai ngambi ngabang ngagai rumah orang Gelong, lalu sida bukai ngambi ngabang ngagai rumah bukai.
Leboh maia hari gawai nyadi, pengabang maioh bendar datai, laban orang deka bepeda ka anak Petara. Nyadi endor orang ngengkah anak Petara nya ba panggau sida Keling. Ngelingi iya ke gali di redai kapua kumbu. Piring sembilan, diengkah ngelingi iya ke gali. Tang bisi ga sekeda pengabang bejako enggau diri sama diri. Ko sida, “Jai bendar gamal anak Petara nya. Nadai patut anak Petara bakanya gamal. Iya ga tuai, pala ga lasu, idong ga binsang lalu bisi litan ba kening.”
Nyadi leboh gawai nya sida Indai Aloi bisi enggau ngabang. Udah badu merarau, dia deh Aloi bisik nilik ka dalam kandang alai anak Petara ke gali. Dia iya meda nya ukai anak Petara tang apai iya empu. Aloi lalu madah ngagai indai iya.
“O, Indai,” ko Aloi bejako, “peda aku anak petara nya tak sebaka endar gamal enggau apai.”
“Eh!” ko indai iya nyaut, “ukai nya apai nuan. Apai nuan lama udah parai. Nama nuan enda ingat leboh iya ke nyumpit lalu enda pulai-pulai.”
Tang Aloi keras bendar madah ka nya tentu apai iya. Enda liat agi ati Indai Aloi, iya lalu nilik ngagai kandang anak Petara ke gali.
Leboh Indai Aloi ke nilik iya, dia Apai Aloi lalu meda Indai Aloi, iya lalu bejako, “O, Indai Duat, idup aku, enda parai. Enti nuan pulai lagi nganti aku,” ko Apai Aloi bejako.
Ninga nya orang lalu begau kia ka. Nya baru sida nemu nya ukai anak Petara, tang Apai Aloi. Udah nya samoa pengabang lalu pulai, laban udah nemu iya nya ukai anak Petara, tang Apai Aloi.
Udah nya Simpurai lalu nanggong Apai Aloi lalu muai iya ari ujong tanju. Pedis endar Apai Aloi, pala iya telih, tuboh iya ga mega, kaki iya kembai. Iya mega nyabak enggau naka iya nat ka pemedis diri, lalu minta ambi anak iya Aloi.
“Mati aku Aloi ti nuan enda ngambi aku,” ko iya nyabak dia.
Tekala nya Aloi lalu ngambi apai iya lalu mai iya pulai sereta sida. Datai di rumah sida lalu ngubat abi telih iya. Indai Aloi mega lantang ati, laban Apai Aloi ke udah dikumbai mati udah pulai idup baru. Pia mega bala anak iya gaga meda apai sida udah pulai.


4. Apai Aloi Nan Abau
Pagi siti Aloi seduai apai iya nan abau. Seduai iya nan abau enda bangat jauh ari ulu rumah sida. Seduai iya merau. Leboh seduai iya datai ba wong siti ke enda berapa tinggi lalu ai pan enda berapa deras, seduai iya lalu ngaga tampun dia. Leboh tampun udah tembu, seduai lalu nan abau seduai iya dia, udah nya seduai lalu mulai ka diri ka rumah.
Tumu pagi siti seduai lalu nurun ngabas abau. Leboh seduai datai semak tampun, Aloi lalu bejako. “Oh! Bulih abau tua apai.” Ninga nya, Apai Aloi lalu malik ngagai abau.
“Oh! Nadai Bulih abau tua nyin.”
“Bisi apai,” ko Aloi nyaut. “Bulih lelabi abau tua.”
“Eh, ukai nya lelabi,” pia ko Apai iya nyaut.
“Nyin daun engkubong,” ko iya nyaut Aloi. ”Aram pulai tua.”
Udah nya Apai Aloi lalu ngelulu ka diri sakit. Iya lalu ngaga diri getar-getar.
“Jampat ka tua pulai, tak lain asai isi aku tu,” ko iya madah ngagai Aloi. Aloi pan lalu bekayoh naka ulih iya, beguai naban ka apai iya pulai ka rumah. Datai di pengkalan seduai iya lalu niki ka rumah. Datai di rumah Apai Aloi ngelulu ka diri balat agi ga sakit.
“Kati abau seduai bisi bulih ?” ko Indai Aloi nanya.
“Nadai bulih,” ko Apai Aloi nyaut. “Mua abau alit laban daun engkubong.”
Nyadi leboh Aloi seduai Apai iya ke pulai, duku Apai Aloi ditinggal ka iya ba tisau jalai pendai. Nyau lama iya udah datai dirumah dia Apai Aloi lalu madah ka diri deka bira, laban perut iya balat endar pedis. Iya mega lalu nurun bira. Pulai iya bira, dia iya madah ka diri udah bisi nyamai agi. “Tang aku agi nat ka diri dirumah. Samoa kita nurun ka umai magang, laban padi kitai agi bisi rumput apin abis dibantun,” pia ko iya bejako.
Indai Aloi enggau bala anak iya pan lalu nurun ga ka umai. Apin lama sida udah nurun, Apai Aloi pan lalu nurun ga ngagai tampun abau. Tang iya enda merau. Iya bedarat nengah jalai ke muntang. Abau nya amat bulih lelabi.
Datai iya ba tampun dia iya lalu munoh lelabi nya. Udah nya iya lalu netak lelabi ke lalu disimpan dalam buloh. Tembu nya iya lalu menyadi ka api, alai iya ngelulun lelabi.
Kira maia tengah hari sida Indai Aloi pan pulai ga ari umai. Datai di rumah nemu Apai Aloi nadai dia.
“Kati amat abau nadai bulih ikan?” ko Indai Aloi nanya.
“Eh?,” ko Aloi, “abau bisi bulih lelabi, tang apai madah ka nya ukai lelabi, daun engkubong. Peda aku nya amat lelabi.”
“Aram tua nurun kin. Tentu apai nuan bisi din,” ko Indai Aloi.
Udah nya Aloi seduai indai iya lalu nurun mai ma. Apin seduai datai ba tam¬pun abau, seduai bisi meda asap.
“Ah!” ko Indai Aloi. “Nyin asap apai nuan, anang inggar tua.”
Seduai iya lalu bejalai begadai-gadai, lalu belalai ba pun rian semak endor Apai Aloi ke ngelulun lelabi, tang iya empu nadai dia. Iya udah mandi ba lubok ari ulu nya mimit. Dia Aloi seduai indai lalu nuang samoa lelabi dalam ruas nya ka dalam ma, lalu diganti seduai enggau keresik.
Udah tembu nyimpan samoa lelabi ka dalam ma, Aloi seduai in¬dai iya lalu pulai ka rumah. Udah nya Apai Aloi pan badu ga man¬di, lalu pulai ngagai endor iya ke ngelulun lelabi.
“Tu lagi baru kenyang perut tu,” ko ia bejako kediri. “Nadai orang nemu aku makai lelabi ditu.”
Iya katawa inggar endar laban ati iya lantang ngadang diri kenyang makai lelabi. Sereta iya datai dia, iya lalu nuang ka lelabi nya ka atas daun ke udah dianchau iya manah-manah ba atas tanah. Peda iya ukai lelabi pansut ari ruas, tang keresik bechampor enggau daun kayu. Udah nya ia lalu nuang ka samoa ruas, tang siti pan nadai ga lelabi dalam nyin. Samoa putong nya penoh laban keresik enggau daun magang.
“Oh!,” ko ApaiAloi. “Nyelai bendar lelabi tu tau bebali nyadi keresik. Nadai utai bukai tentu lelabi tu udah diempa antu. Enda aku berani diau ditu agi, enti antu nya datai tentu iya deka makai aku. Nasit ga aku nadai ditu leboh antu datai lalu makai samoa lelabi aku tadi,” ko iya bejako kadiri berandau nengali.
Udah nya iya lalu beguai-guai mulai ka diri ka rumah, sampai ka duku enggau labong iya pan enda meh iya ingat mai pulai. Iya lalu belanda naka penegar iya.
Leboh iya ke belanda, dia dan punggu kayu bisi laboh ari puchok kayu, lalu inggar bendar meredup laboh ka tanah. Nya ti ngasoh iya tekenyit bendar ati lalu rari belanda tegar agi, laban iya ngumbai nya redup kaki antu mansang semak deka makai iya.
Leboh iya ke belanda nya, iya nyau rauh-rauh minta tulong Aloi, “Tulong!… tulong!… Mati aku tu, ambi aku Aloi!… Antu deka nangkap aku!” ko iya.
Tang laban jako iya enda bangat inggar ketegal iya nyau deka luput laban kelalu kesal dijungkal kandang dada, nya alai sida Aloi seduai indai iya nadai ninga. Leboh iya datai di rumah iya pan lalu rebah ga luput. Ninga bisi utai bemunyi di ruai, Aloi pan lalu pansut nilik ari bilik, lalu meda apai iya gali di tengah ruai.
“Lapa nuan apai?” ko Aloi nanya, tang iya enda nyaut. Indai Aloi agi kiroh mela lelabi di bilik. Aloi lalu ngangau. “Oh! Indai,” ko iya. “Mati apai tu, nama utai nganu iya tu.”
Indai Aloi pan lalu pansut ari bilik lalu meresa samoa tuboh Apai Aloi, tang nadai ga nemu bisi abi, tauka pantok ular. Enda lama udah nya Apai Aloi pen lalu ngeleda ari luput.
Aloi seduai indai iya lalu nanya, “Nama kebuah nuan baka tu Apai?”
Apai Aloi lalu nyaut. “Tengah hari tadi aku ngelulun lelabi ulih abau. Udah mansau lulun aku lalu mandi. Pulai aku mandi, nemu lelabi udah abis diempa antu. Samoa ruas disimpan ka antu keresik kena iya nganti lelabi. Enda berani dia agi, aku lalu belanda pulai ka rumah. Lalu redup kaki antu bisi didinga aku nitih ka aku. Nya alai aku lalu belanda naka tulang. Datai di rumah tu aku lalu luput.”
“Eh! Keba nuan tu tambap,” ko Indai Aloi bejako, “leboh seduai Aloi ke ngabas abau Aloi endang meda lelabi, tang nuan madah ka ukai lelabi, Daun engkubong ko nuan. Nya nuan ngakal kami, tang nuan ukai semina ngakal kami tang lalu ngakal nuan empu. Manah endar ti lelabi dibai seduai Aloi pulai ka rumah, tentu bisi ka lauk kitai sama. Nya dilulun nuan dalam babas, nya alai iya diempa antu. Tak sekumbang tua udah begulai tu nuan nan abau, sakali pan nadai meh kala bulih. Tak bulih daun engkubong beari-ari ko nuan. Nya alai nuan tambap belama-lama.”
Tang taja pan Apai Aloi suah salah pengawa, ngakal sida sabilik enda ga Indai Aloi kala datai jari ba iya. Leboh iya sakit, tabin tauka pemedis bukai, sida bini-anak iya endang ngintu iya enggau manah.
Lemai nya Apai Aloi udah ga badu lelak, lalu leboh sida makai lemai nya sida sama belauk lelabi ke ulih abau Apai Aloi tadi.
Dia Apai Aloi nanya, “Dini kita bulih lelabi tu deh?”
“Eh!” ko Indai Aloi, “tu lelabi beri antu. Leboh kami pulai ari umai tadi, betemu enggau antu pulai ngabas abau. Iya lalu meri kami.”
“Nelap endar antu enggau kita. Enggi aku abis lelabi diempa lalu diambi antu,” ko Apai Aloi.
“Kati ko baka gamal antu nya?” ko iya nanya.
“O, manah, sigat bendar gamal iya. Tak baka gamal nuan leboh nuan agi bujang menya,” ko Indai Aloi nyaut iya.
“Nya alai enti abau nuan bisi bulih lelabi, anang ngelulun iya dalam babas agi, enggai ke abis diambi antu. Tambah mega enti nuan selalu ngakal kami, nengali lelabi, nengali jelu, nengali ikan ulih bubu, aku enggai begulai enggau nuan agi. Nyamai aku begulai enggau antu ke nelap enggau aku, iya suah meri aku lelabi, meri aku babi,” ko Indai Aloi.
Ninga jako Indai Aloi munyi nya, dia Apai Aloi mega tusah laban iya takut ka Indai Aloi enggai begulai enggau iya agi. Iya mega lalu bisi sangka ka Indai Aloi nya bisi bepangan enggau antu ke suah meri iya lelabi enggau ikan tauka babi.
Berengkah ari nya, dia Apai Aloi bisi ngetu enda lama ngakal sida sabilik, leboh iya bisi bulih babi, ikan tauka lelabi. Tang taja iya bisi kurang agi ga ngakal sida sabilik ba jelu enggau ikan, tang iya balat ngakal senentang ba buah, baka buah lensat, sibau, rian enggau buah bukai.


5. Apai Aloi Nyadi Barukap
Nyadi bisi sakali leboh maia Apai Aloi berunding dalam ati diri. “Aku tu, suah bendar udah alah dikeduan Enchelegit. Leboh aku bulih babi, bulih lelabi, bulih ikan, iya ngaga diri nyadi ngingit lalu minta utai ari aku. Nya alai diatu manah aku malas,” pia ko iya bejako.
Tiga lemai Apai Aloi udah berunding munyi nya, Indai Aloi pen lalu ngaga tumpi mulong. Leboh Indai Aloi berengkah ngirau mulong, dia Apai Aloi nurun ari rumah ka tanah, lalu belalai di baroh rumah, senentang Indai Aloi ke ngaga tumpi mulong. Nyadi hari maia nya nyau udah sabong petang. Enda lama udah nya, iya lalu berengkah bemunyi,
“Barukap! Barukap! Barukap!
Minta tumpi mulong
“Barukap! Barukap! Barukap!
Minta tumpi mulong”
Leboh Apai Aloi nyebut jako nya, Indai Aloi endang ngelala nya jako Apai Aloi laban iya enda ulih ngelalai ka idol leboh iya bejako.
Udah nya Indai Aloi lalu nyaut, “Anang guai dulu, tumpi apin mansau.” Udah nya Indai Aloi lalu nunu batu bulih mesai betis. Ninga Indai Aloi madah ka apin mansau, Apai Aloi bejako baru ga ari baruh rumah,
“Barukap! Barukap! Barukap!
Minta tumpi mulong
“Barukap! Barukap! Barukap!
Minta tumpi mulong”
“Nganti enda lama agi, nyau ka mansau, lagi baru meri nuan,” ko Indai Aloi nyaut ari dapor. Nyadi maia nya batu ke ditunu Indai Aloi apin chukup angat.
Leboh batu nyau udah mansau bendar, Indai Aloi lalu ngangau ari dapor, “Nya tumpi mulong, sambut jampat ka ulih nuan!” ko Indai Aloi.
Ninga Indai Aloi ngangau, Apai Aloi lalu beguai nyambut ari baruh, laban iya ngumbai nya amat tumpi mulong ke dibuai Indai Aloi ari dapor. Disambut iya batu nya tadi lalu deka dipangkil iya enggau ngeli. Ensepi utai nya angat bendar, iya lalu nyeraoh. “Akai indai! akai apai! parai aku tu! Ambi aku, Aloi, ambi!” ko iya enggau sabak-sabak.
Nyadi leboh nya Aloi enggau bala menyadi iya agi dudok di ruai, nganti tumpi mulong ke digaga indai sida mansau. Ninga bisi orang besai tuai nyabak di baroh rumah, Aloi lalu ngangau ka indai iya.
“Indai! Sapa orang nyabak di baroh rumah dia?” ko Aloi ngangau.
Apai Aloi agi mengkang nyabak di baroh rumah. “Akai rai! mati aku!” ko leka sabak iya.
Deka iya pulai, enda nemu jalai ngagai tangga, laban utai bangat petang enda peda achok mata. Nyau baka redup tiang rumah sida tu tempoh iya dalam petang. Papong tengkiong pan nyau baka setak kena sipak iya ke ngerijat nat ka pemedis abi betu. Udah nya baru Indai Aloi nyaut, “Sapa deh orang bukai, apai nuan meh nya”.
“Nama kebuah iya tak nyabak di baroh rumah deh, indai?” ko Aloi nanya indai iya baru.
Apai Aloi mengkang ga nyabak ngangau ka Aloi, “Ambi aku, ambi aku, Oh Duat. Mati aku tu. Dada enggau jari aku betu laban batu, tunu indai nuan.”
“Alai meh Aloi, ambi meh apai nuan nya,” pia ko indai iya bejako.
Aloi, laban ka mereti ka ulah apai seduai indai iya, lalu nurun mai sempun api lukai kena iya betenggau, mansang ngambi apai iya ka baroh rumah sida.
Datai Apai Aloi di rumah iya lalu nanya, “Oh, Indai Duat, kapa nuan meri aku batu tunu? Ukai nya ke dipinta aku,” ko iya bejako agi enggau sabak.
“Ni aku nemu nya nuan, iya ga barukap ke bemunyi minta tumpi mulong. Nama kebuah nuan tak diau di baroh rumah besagam ngelaban petang dia? Ukai bisi utai ulih nuan dia. Aku ngaga tumpi mulong tu di bilik kitai ditu. Enti deka makai mulong, tak tama ka bilik kitu. Paneka ati nuan nyamah. Ukai nya orang bukai ke ngaga nya, bini nuan empu,” pia ko Indai Aloi nyaut sambil tuchum lelegup.
Udah mansau tumpi mulong, sida Aloi menyadi lalu sama makai mulong, tang Apai Aloi enda enggau makai mulong, laban betu ba dada enggau ba jari iya balat bendar. Udah badu makai mulong, nya baru Aloi seduai indai iya ngubat betu Apai Aloi.
“Kasih, kasih meh nuan Apai Duat, udah ga tambap, lap ga agi,” ko Indai Aloi bejako.
“Eh! Enchelegit, anang bejako agi! tindok kitai, lama lemai udah,” ko Apai Aloi. Udah nya sida sabilik lalu sama tindok magang. Tang Apai Aloi malam nya enda tentu jenak tindok, laban samoa abi betu iya nyau berasai nyengut magang.


6. Ensera Aloi Mati Kentut
Nyadi jerita tu bedudok ari Aloi seduai Ini iya diau nyembuah kadiri di Nanga Sungai ke dikumbai Sungai Isang Bebelit, Pati Batang Gelong. Seduai enda bangat jauh kulu. Orang ke diau ari ili seduai pan maioh, ka nyau semak pasar ba Nanga Sungai nya.
Nyadi skali nyepi diri nyau puas makai nadai lauk, dia Ini Aloi bejako enggau Aloi. “Aloi, pama nuan undor ka pasar, ngipa utai ka lauk, nyau puas nadai lauk, nadai garam.” Ko iya.
“Au, aram meh Ini,” ko saut Aloi.
Udah nya seduai lalu beradu. Aloi tu tadi beradu baka ke enda, samina melit ka sirat sebelit aja,. Udah iya tembu melit ke anak sirat iya, Aloi lalu nurun minching sengayuh siti. Datai ba pengkalan, endang enda chachamang lalu nepan ka perau, lalu belabuh bekayuh penapat inat. Iya bekayuh sapagi-pagi. Peluh tudah Aloi ngenjing bekerenjoi nurun kening, ti baka iya bebaju endang sigi tentu basah laban peloh, tang laban iya enda bebaju. Nyau kelama-lama iya ke udah dugau-dugau bekayuh, dia deh iya ninga auh kukok manok. “Ah! Enda jauh agi pasar,” pia ko ati iya bejako kediri berandau nengali. Nyau ka lama dinga gerong-gerong labu orang mansang nyauk datai ari atas. Ari maia nya nyau ka tengah hari.
“Nama nya nuan deh Aloi?” pia ko Ini iya.
“Nama nya nuan ga deh Ini?” ko saut iya. “Kemaia nuan datai ditu deh Ini?” ko iya nanya Ini iya.
“Nama utai ditanya ka nuan. Tu ga endang pengkalan kitai.” Ko saut Ini iya.
Angkat deh Aloi tu tadi enda ingat muka tali perau ari liking. Iya ke bekayuh nya tadi endang enda mindah ari pengkalan sida empu.
“Aih deh Aloi. Andal-andal aku ngumbai nuan udah datai di pasar meli lauk. Enti pia, aram meh tua sama undor ka pasar,” Pia ko Ini iya.
Ini iya lalu muka tali perau ari liking, serta ngejang ke luan perau. Seduai lalu berkayuh undur ngili ai Gelong. Apin bangat jauh udah seduai ngejang la pengkalan, dia Aloi lalu tepeda ka bangkai ukoi. Aloi enda senunoh bendar, endang sebarang utai rara.
“Nama nya tak baka ukoi tua deh Ini?” ko iya.
“Badu enda iya meh nya.” Ko Ini iya nyaut.
“Enda tua tau nyadi undor, Ini. Jai burung tua.” Ko Aloi.
Enda meh seduai nyadi undur ka pasar, laban udah meda bangkai ukoi. Seduai iya ga jai burong.
Ukoi nya udah mati kira dua tiga hari dulu ari nya, diatu iya nyau melepong laban udah bentut serta bau buot. Leboh Aloi narit bangkai ukoi dia iya nanya, “Kati alai bangkai ukoi tu tak bebau deh Ini? Mati ukoi tu?” ko iya.
“Au, udah mati meh nya,” Pia ko saut Ini iya. “Nama iya bebau sium nuan udah mati meh nya.” Ko Ini iya madah ka Aloi.
Nyadi pagi siti Aloi seduai Ini iya sama tumu beradu deka undur ka pasar ngalu utai ka lauk. Seduai lalu sama nepan ngagai perau ti endang udah dibuka Ini Aloi lalu undur ngili Sungai. Kira tiga tanjong seduai udah undur ngili ka ai, dia seduai lalu betemu enggau bangkai buot ukoi tepanggai ba tugong reba ti betakat ba tengah ai. Bau bangkai ukoi ngenjing nempoh lubang idong. Tang endang baka Aloi, sebarang utai rara.
“Kati alai ukoi nya bebau Ini? Mati ukoi nya?” ko Aloi.
“Au, mati meh ukoi nya,” ko Ini iya nyaut.
Seduai pan majak ka diri berkayuh seruran regup-regup ngili ai. Nyau ka lama seduai ti udah bekayuh, dia deh Ini Aloi lalu kentut. Nyau berenyang asai perau kena kesuh kentut Ini Aloi, serta balat bendar bau. Laban iya ke luan nya alai bau kentut balat bendar ngesuh ngagai Aloi ti di kemudi, serta nempoh iya ke ngemudi.
“Apu! Mati meh Ini tu.” Pia ka Aloi bejako dalam ati diri. Iya dipeda tusah ati. Luan perau lalu dituntung ka iya ngagai tebing. Ini iya lalu disangkai ka iya dia.
“Nama main nuan nyangkai ka aku ditu dah uchu?” ko Ini iya nanya Aloi.
“Nuan ga mati deh Ini,” Ko Aloi.
“Enda aku mati deh uchu,” Pia ko tudah Ini iya nyaut Aloi.
“Mati meh nuan. Nuan ga nyau bebau deh,” Ko Aloi ngelaban Ini iya dia.
Tanggong iya Ini iya ke tebing lalu kejang ke iya perau baru takut ke Ini iya ke udah mati nepan baru ko ati iya.
“Keba nuan tambap deh Aloi.” Ko Ini iya ngangau ari jauh.
Dia Aloi lalu mupok bekayuh. Iya enda beduli ka kanggau Ini iya. Dia iya bekayuh kediri-diri ngili ai. Udah nya iya ninga burong richah. “Nama utai empa burong nya da dia?” ko ati iya. Datai iya ba senentang burong ke richah dia iya rangap-rangap mengkadah katas. Peda burung mit enggau burong ke besai nya baka ke bebintih makai buah kara. Peda iya jelu anak pan ngemaioh nya. Da tan-tan ke iya perau serta rangap-rangap nengkadah burong enggau jelu ba pokok kara. Sepi iya tak merubas tama rekong iya, tai engkerabak enggau tai burung labuh ari atas, lalu telan iya. “Ho! Udah mansau endar buah kara, nama tu tak nyau penat asai buah tu tama nyawa aku deh?” ko ati iya.
Nyau kenyang iya laban pemaioh tai jelu enggau tai burong ti laboh tama nyawa iya. Udah nya Aloi lalu bekayuh nat ke perut nyau segai kenyang. Lama agi segai agi ga asai perut iya. Purus iya perut sepi nyau tengelam belit sirat laban angin dalam perut. Apin bangat jauh ari nya dia iya lalu kentut inggar bendar. Nyau bernyang perau kena kesuh kentut Aloi.
“Apu!” ko iya .”Mati meh aku tu deh. Bau kentu Aloi nyau baka bau buot ukoi. Aloi tu tadi lalu tusah ati berunding ka diri ti ka mati. Dia iya nyau enda engkebut dudok dugau-dugau ba kemudi perau. Sengayuh ke dikena iya nyau tebelengka ari jari. Perau iya lepong-lepong rarat ngili ai. Leboh iya mansa maioh buah rumah orang, dia orang alit ati meda gaya iya. Ditanya orang iya endang enda nyaut laban udah mati.
Leboh iya tepeda ka buah nyau mirah mansau, dia iya mengkelak. “Ah! Sayau meh aku tu udah mati. Enti aku enda udah mati, tentu aku olih niki lalu makai buah nyin.” Ko iya bejako kediri, berandau nengali. Maioh macham buah bukai dipeda iya.
Ari ili nya dia iya meda orang nyual ikan, undang, burung, keli enggau macham lauk bukai. Leboh iya mansa pasar dia iya balat agi ga tusah ati. Orang ke bepansa enggau iya pan alit bendar ati iya tak beranyut enggau perau enda kebut-kebut. Nyau kelama perau iya nyau pansut ari nanga sungai ngagai tasik besai ledong lalinang. Dia iya lalu besatup enggau ribut ke bepuput bepulas uchong, angin ke bepusin puting beliong, kilat jampat ngelambai bungkong, guntur temepur inggar tetaung, bakul muat gelumbang besabong, mangka ka januar kapal lambong, putus serumbong patah singkilong rantai besi.
Nyadi perau Aloi ama tenggelam ama melepong ama telentang ama mengkanjong. Iya empu nyau tenggelam ditaban ke bangkung. Nadai agi pegari panjong, enggau orang ka Tanjong stak-stong, betumpu dan enggau wong tujoh beranggong, tuai sebayan ke dajan dulu pumpong, mandi di lepong mandai mati. Mati meh tudah Aloi nengali hari, parai meh Aloi nengali lemai, dajan meh tudah Aloi Tambap nyenggai bulan.


7. Ensera Antu Lakak
Nyadi ensera Antu Lakak tu manah endar didinga anak mit. Kenu ko ensera tu, Apai Aloi tu orang ke udu bendar rindu ka pengawa nyumpit enggau berikan. Sekali leboh nya menya iya ka ngasu ngagai kampung ti enda jauh ari umai sida, laban bekau babi bisi endar ngachau utai ti ditanam sida ba umai.
Nya alai hari siti, agi petang, dia Apai Aloi ngasuh bini iya Enchelegit berapi ka bekal. “Oh Indai Duat, berapi nuan ke aku dia.” Ko ia. “Aku tu deka ngasu katas kia pagi tu”.
Nyadi Enchelegit lau nyaut, ninga Apai Aloi ke deka ngasu. “Pama agi nyumpit tau ke begiga ikan ke ulu sungai Ai Madu, endor ikan betelu nyaru, ngabu nyungkang ke batang,” pia ko Indai Aloi. “Nama guna nyumpit samina ngulih ke burung ke ka mesai bulu mata.” Ko iya.
Udah nya Indai Aloi lalu berapi Surong jari, Surong kaki. Jari nyau baka ke deka muar kesa, kaki nyau baka ke sengat semada. Asap melap datai di para asi pan lega. Asap melap datai di sadau asi pan mansau. Asap melap datai di perabong asi pan ditanggung.
Udah asi iya mansau, Indai Aloi lalu mungkus bekal ngena upih, lalu nyimpan garam, belachan, semakau enggau daun gentu ke insap Apai Aloi. Udah Indai Aloi tembu ngadu ke bekal, dia Apai Aloi lalu mupok nurun ngasu. Iya ke nurun lalu mai ukoi iya ke benama Jela.
“Diih Jela, diih-diih,” ko iya ngangau ka ukoi iya. Jela lalu kaong-kaong nitih ka iya nurun. Datai iya ba tisau serarai dia lalu ninga nendak muak ke kiba, lepas nya lalu dibalas nendak tunga ke kanan.
“Oh! Manah burung tu.” Ko ati Apai Aloi, “laban nya burung surung Unggat, burung ngayu ka mandok jelu.” Ko ia bejako kediri berandau nengali. Enda berasai iga bejalai ari ke ninga burung nya tadi dinga tak nyerarat salak Jela.
“Jamah Jela jamah, jamah Jela jamah!” ko ia ngangau ke ukoi ia. Iya seruran nitih ke salak ukoi. “Chih! Chih! Chih! As-Jela-as! as-Jela-as!” ko iya meransang ukoi iya. Enda lama udah dinga iya naan babi. Iya lalu guai-guai belanda ngagai babi ti naan. Tang tak enda mukai-mukai kaki iya lalu tesangkut. Iya pan lalu terap lalu beberap ke pun rutan dudok.
“Hah! Pachal ga kaki tu enda meda jalai!” ko iya muchau. Iya lalu ngeransi ngigit kaki diri empu, empa pemedis ati iya. “Akai-rai!” ko iya, “Pedis endar kaki aku.!”
Udah nya iya angkat, lalu belanda baru, nitih ke Jela. Bekal iya abis berayan sebelah babas, empa pemendar iya ke belanda, nyau enda nemu bekal abis teberayan laboh ari ma. Nyau kelama Apai Aloi udah nitih ke Jela iya pan datai ga ba endor babi ke nan ka Jela. Nya baru iya meda babi besai bendar. Babi nyau tekup-tekup ba ulu lebak. Udah nya ansak ka Apai Aloi semak ke agi, nyau umbas penyauh alai iya nikam, nya baru iya numbuk babi enggau sangkuh kebat, lalu chuit-chuit lekat ba rusuk kanan. Kena endar abi disilinting Apai Duat. “Hah! Tu baru iya lagi!” ko iya. Udah nya baru iya mulai kediri mai bangkai babi. Bulih samaut pemanjai taring babi, lalu di san Apai Duat segala-gala. Kenu ko cerita, nyau bungkok undang belakang Apai Duat kena tating pemesai babi. Leboh iya nyan bangkai babi bisi ga endur iya berunding enggai mai babi nya datai ka rumah tang ditinggal ka iya ba tisau umai.
Datai iya dirumah serta udah begari, iya baka ke enda ga, lalu minta api kena iya bekindu. “Meri aku api nuan dia, Enchelegit, kena aku bekindu. Chelap bulu tu.” Ko iya nganu Indai Aloi. Enchelegit pan lalu pansut ga ari bilik mansang mai api kena Apai Aloi bekindu, laban Apai Aloi kumbai iya amat chelap bulu munyi ko iya.
Nyadi leboh iya bekindu, nya ga ulah Apai Aloi, iku sirat diulur ka iya ngagai api. Udah nya lalu ngangau ke Enchelegit baru. “Oh! Indai Duat! Indai Duat! Meri aku kayu maioh ag chelap bulu tu.” Ko iya. Dia lalu ngaga diri digak-digak chelap. “Heh! Iko sirat nuan angus apai.” Ko Aloi. “Enda apa, aku chelap, lak ke angat agi,” ko apai iya nyaut.
Indai Aloi pan lalu pansut ari bilik mai kayu seberekas mesai kisar. “Kapa nuan kayu, Apai?” ko Aloi. “Eh! Ke sengkilu. Dikena aku bira,” ka saut iya.
Udah nya Apai Aloi lalu nurun deka mansang bira. Nyadi Indai Aloi enda tentu lantang ati, bisi sangka ka iya bisi bulih babi.
Udah nya Aloi seduai indai iya lalu nurun nitih ke apai iya. Datai seduai, dia meda Apai iya benong meruti babi. Nyah! Peda nuan Aloi,” ko indai iya nganu Aloi. “Nya ulah apai nuan enggau tua.”
Udah nya seduai lalu berunding deka ngaga diri nyadi Antu Lakak. Dia seduai lalu bemunyi. “Lakak! Lakak! Lakak! Enti enggai meri pah spiak, aku peruti perut nuan lagi.” Ko Enchelegit. Ninga Antu benong minta babi lalu ditikam ke iya pah spiak ke babas diberi ngagai Antu.
Udah nya bemunyi baru ga seduai. “Lakak! Lakak! Lakak! Meri pah spiak agi, enti engggai meri keruk leka mata nuan lagi.” Lalu ditikam ka Apai Aloi ga pah spiak ke babas, beri ngagai antu. Nyau kelama tak enda berasai samoa isi babi nyau abis diberi ngagai antu. Samina tinggal pala enggau perut agi, ka nya meh ungkup Apai Aloi. Samoa isi bukai udah diberi ngagai Antu Lakak magang.
Udah tembu iya mela makai pala enggau perut babi nya tadi, iya lalu mupok mulai ke diri kerumah. “Ah! Tembu endar nyawa tu,” ko ati iya. Datai dirumah, iya lalu bekindu. Udah nya iya lalu nindok ke diri. Leboh iya iya tindok lalu rangap-rangap mulut iya, endang baka penindok iya. Indai Aloi lalu nyungkit tinga iya, nyau bulih semangkok tinga iya disungkit Enchelegit.
Meda tinga ngemaioh nya, lalu dilulun Indai Aloi nyau bulih seruas munti. Sekumbang iya ke tindok, dia tikus lalu ngigit idung iya, idung iya lalu binsang, nya mun Apai Aloi lalu idul bejako. Udah mansau lulun tinga Apai Aloi, lalu dituang ke dalam mangkok tachu. Udah nya Enchelegit lalu ngumbai makai. “Makai Apai Duat! Makai kitai tu.” Ko Indai Aloi. “Au, lapar perut tu,” ko iya. Mangkok pansuh tinga diengkah ke Indai Aloi semak chapak iya, lalu lauk ke bendar nya diengkah ke Enchelegit semak Aloi seduai iya.
Udah nya sama makai sida menyanak. Sepi Apai Aloi lauk tak penat. “Nama lauk tu tak penat?” ko iya. Meda bakanya iya lalu nyepi lauk Aloi seduai Indai iya. Sepi iya tak nyamai. “Nama lauk kita nyamai deh? Lauk aku tak penat, nadai asai.” Ko iya nganu Indai Aloi.
“Enda nemu meh, sama belauk lauk nya ga kitai,” ko Enchelegit. “Enda ah, tak lain gamal enggi aku tu. Tak bau telu manok banggar.” Ko Apai Aloi. “Enggi seduai bisi kerat, enggi aku tak pamur.” Ko iya.
“Nuan ga tambap,” ko Enchelegit. “Nama penambap aku?” ko iya nyaut Indai Duat. “Tinga nyah nya, tinga nuan empu ka lauk nuan nya.” Ko Enchelegit.
“Beduan aku nuan Enchelegit.” Ko saut Apai Aloi. Gamal iya udah ringat, nyau gitik-gitik anak buah isi iya bai iya ngering diri bejako.
“Nadai beduan nuan, tang nuan ke beduan kami duai Duat. Nuan ga bam angam, nuan ke tambap lap.” Ko Enchelegit nyaut iya. Iya tak nyau chinang-chinang leka mata empa pemedis ati iya. “Nuan ke nengali babi kediri enda ngampit ka bini-anak dirumah.”
Ninga nya iya lalu tendu mimit bejako, ngasai kediri endang amat udah deka nengali babi. “Dini agi bisi babi! Udah dipinta Antu Lakak nya alai aku ke nadai mai pulai kerumah,” ko iya.
“Badu enda meh Apai Duat. Kami dua Aloi ke ngaga diri nyadi Antu Lakak tadi. Meda nuan bangat angam bam nengali babi.” Ko Enchelegit.
“Oh apai kita nya deh! Enti aku nemu nya seduai ke nyadi Antu Lakak, anang ke isi, tunjing pan enggai meh aku meri seduai.” Ko iya nyaut, tang iya nyau balat bendar malu. Angkat iya nyau pansut keruai, lalu ngempas ke pintu. Iya lalu enda makai, laban ringat ke nya. Datai iya diruai lalu gali babungkur apus enggau pua tekalong.


8. Ensera Apai Aloi Jaga Upih
Nyadi Apai Aloi tu endang sigi nadai tentu batang peneawa ti menuku dikerja tiap hari, kelimpah ari iya ti nyumpit, nginti ikan, nan bubu, manjok enggau ngelakar orang kulu kili. Bumai pan dikereja iya mega, tang ke lebih agi ngintu pengawa umai nya Indai Aloi ke dikumbai Enchelegit.
Nyadi bisi skali leboh umor Apai Aloi kira dua puloh buan taun, baru udah beranak ka Aloi, dia iya bisi nerima surat panggil Perintah ka opis Polis. Leboh iya nerima surat panggil Polis iya lalu tusah ati. Nama penyalah iya alai polis manggil. Hari siti iya lalu undor mai surat panggil ngagai kubu. Datai iya dikubu iya lalu nyua ka surat panggil nya ngagai kunsil.
“Nama penyalah aku tu” Nama kabuah alai perintah tak manggil aku?” ko Apai Aloi nganu kunsil. “Aku enggai ditekan ka salah ngapa,” ko iya.
Udah nya Kunsil lalu nerang ka kabuah alai Apai Aloi ke kena panggil perintah. “Ukai bakani kati alai perintah ke manggil nuan Apai Aloi,” ko Kunsil, “tang laban nuan ditemu gagah, berani, lurus serta bisi pemintar, tambah agi nuan endang penikar dalam pengawa main baka bekuntau enggau bepencha. Nya alai diatu perintah deka ngambi nuan nyadi mata-mata.” Ko Kunsil madah ngagai Apai Aloi. Nyadi leboh maia tu Aloi baru apin lama udah ada. Retinya Apai Aloi agi biak baru apin lama udah jadi enggau Indai Aloi.
Ninga munyi nya nadai utai ngaga nya Apai Aloi deh. Iya nyau betempap pah dia, serta lalu muka bunga pencha mimit ba moa kunsil.
Udah nya Kunsil lalu ngasoh iya betemu enggau Sap-polis ngambi ke Sap nya madah ka ni maia iya belaboh kereja. Apai Aloi diulu ka orang mata-mata siko, betemu enggau Sap polis. Leboh seduai iya tama bilik Sap, Sap nya benong nulis. “Tabi tuan Sap,” ko Apai Aloi. Kaki iya lalu dientak ka iya, Sap lalu tekenyit. Pinsil ke dikena Sap nulis lalu tepelanting. Orang mata-mata ke ngulu ka Apai Aloi pan sama tekenyit udu bendar. Udah nya Sap lalu ngasoh Apai Aloi dudok.
Udah nya Sap pan lalu bejako enggau iya. “Nyadi nuan diatu Apai Aloi diambi perintah nyadi mata-mata. Nya alai nuan pegila jam pukol lapan pagi niki opis, lalu belaboh jaga,” pia ko Sap madah ka iya “Barang iya meh Sap,” ko iya. “Kati nuan nemu surat?” ko Sap nanya iya. “Enda aku nemu orang nya,” ko iya nyaut Sap. “Dini alai iya diau deh Sap?”
Nyadi leka jako ‘surat’ nya dikumbai Apai Aloi nama orang. “Ukai nanya ka orang ke benama surat aku,” ko Sap, “tang nanya ka nuan nemu tauka enda macha surat enggau nulis,” pia ko Sap bejako enggau Apai Aloi.
“Diatu apin nemu aku,” ko saut Apai Aloi. “Tang enti udah belajar pagila lusa nama kebuah enda nemu deh, “ ko saut Apai Aloi. “Jako ngelis nemu ga aku mimit,” Ko iya.
“Badas nya enti nuan bisi nemu English,” ko Sap. “Nya alai uji saut olih nuan tanya aku tu,” ko Sap, “Yiis ah” ko saut Apai Aloi.
Tanya Sap baru ga iya. “What is your name?” No! No nem” ko saut Apai Aloi. “Nyangka tak salah dinga Apai Aloi jako aku tadi,” ko Sap berunding dalam ati diri.
Udah nya iya lalu nanya Apai Aloi baru. “Where did you come from?” ko Sap. Saut Apai Aloi. “U-rait! Ko iya.
Ninga saut Apai Aloi tak nadai senentang enggau tanya iya, dia Sap ka ringat-ringat. Moa Sap nyau bisi bebali merah. Nya alai iya lalu nanya Apai Aloi baru, ko iya, “Are you foolish?”
“Ting kiu-yu” ko Apai Aloi nyaut Sap nya baru. Apai Aloi lalu ketawa rakah-rakah. Kabuah iya ke ketawa, laban ko ati iya samoa saut iya betul magang.
Nyadi randau seduai lalu enda betemu ke bejako ngena jako English, laban Apai Aloi semina nemu seleka dua jako English. Tang leka jako ke ditemu iya seleka dua nya ukai utai ti patut dikena nyaut Sap.
Udahnya tadi Apai Aloi lalu diasoh Sap sama diau begulai enggau orang mata-mata bukai ba rumah birik polis. Kejang iya deka tindok lemai nya, dia Apai Aloi berunding ka jako Sap ke ngasoh iya niki upih, ukai niki ngagai Opis. “Nyelai bendar pengawa aku tu diasoh Sap, tak niki upih,” ko iya bejako kadiri.
Apin jam pukol lapan pagi iya pan lalu dani, empungas moa, lalu begari. Ngeli iya endang enda di berus. Udah nya Apai Aloi lalu bejalai gining-gining ngiga pinang ke bisi upih. Iya lalu niki pinang ke semak rumah alai iya diau, lalu muai upih. Udah nya iya lalu mai upih nya ngagai Sap dikubu. Datai iya din lalu nyua ke upih nya ngagai Sap. “Tu, upih ti diasoh nuan tiki aku Sap,” ko Apai Aloi.
“Eh! Nadai aku ngasoh nuan niki upih deh,” ko sap. “Paloi nuan tu! Niki ka kubu tu. Nemu nuan?” ko Sap merak iya. “Nemu aku nuan ga udah madah, nya utai dipadah ka nuan nya ga utai dikereja aku,” ko saut Apai Aloi.
Nyau kira saminggu Apai Aloi udah bekerja gawa nyadi mata-mata, iya lalu diasoh Serejin ti nguasa sida jaga jam, laban nyau kena idar Apai Aloi jaga. “Pegila ti jam mangkung pukul lapan, palu enggau iya.”
“Au Serejin,” ko iya nyaut Serejin. “Ukai nya pedis malu jam nya deh.” Ko iya.
Pagi siti, Apai Aloi lalu nurun ka Opis, tumu bendar, hari pagi nya agi beambun-ambun, laban enggai ka enda sempat malu jam. Leboh jam bemunyi benong mangkung pukol lapan pagi, lalu enda chachamang lalu palu iya enggau pemangkung jam, sereta udah abis pangkong ari satu – ngagai lapan. “Nyah! pukul lapan udah jam tu,” ko iya bejako kedir. Nama deh nyau redak jam nya udah bekau palu. “Ukai Serejin enda nemu pengering aku deh,” ko iya agi bejako kediri.
Enda lama udah nya, Serejin pan lalu datai ga di Opis. Leboh iya mansa ba moa pintu ti endor jam nya digantong, peda iya jam nyau redak dipalu Apai Aloi. “Apo! Parai laban nuan tu,” ko iya. “Abis jam perintah dipalu nuan. Kati gila nuan, alai nuan malu jam baka nya?” ko Serejin nanya iya.
“Enda, nuan ke gila ngasoh aku malu jam, enti iya udah bemunyi pukol lapan,” ko Apai Aloi nyaut Serejin.
“Ukai jam nya ke dipalu ko aku, nyin besi digitang ba moa pintu, ke diasoh aku palu nuan enti jam mangkong pukol lapan,” ko Serejin. “Merinsa ga ngasoh orang ti beli ti enda nemu reti jako gawa,” ko iya.
“Nuan nadai madah ka aku ngasoh malu besi nyin, kati ko aku nemu malu iya deh. Aku tu orang baru masok kereja, dini aku nemu utai ulu enggai ili, nya utai asoh kita nya ga utai dikerja aku.” ko Apai Aloin nyaut Serejin.
Udahnya Serejin lalu nguing ka mao iya kabukai empa pemedis ati iya.
Leboh ditanya Sap, Apai Aloi madah ka Serejin ke ngasoh malu jam. Serejin pan madah ka diri silap, laban enda madah ngagai Apai Aloi enggau terang agi, lalu iya minta ampun ngagai Sap. Udah nya Serejin lalu diasoh nganti jam nya enggau jam baru. “Nya alai nuan Apai Aloi sekira ka enda tentu salah, tambah nuan agi baru bekereja, laban nya aku agi ngampun nuan. Tang kagi tu ila, enti nuan apin tentu nemu pengawa ti diasoh orang anang enda betanya enggau silik, anang terus ngereja utai buta penemu,” ko Sap madah ngagai iya.
“Ting kiu yu!” ko Apai Aloi. Iya lalu ngentak ka kaki iya nabi Sap.
Lepas nya baru Apai Aloi nyau mansang nemu gawa sereta betanya ka utai ti enda temu iya. Iya mega belajar macha enggau nulis, serta belajar ke jako orang putih. Nyau manah jako English iya. Lima taun udahnya iya lalu niki Pangkat Koperal. Aloi seduai Indai iya pan sama diau ba birik enggau Apai Aloi. Aloi nyau deka tau duanjong Apai iya ngagai skula anak mit.


9. Ensera Apai Aloi Nyadi Tukang Tujom
Nyadi sekali kalia sida Apai Aloi sebilik belangkau nyembuah ba tebing tasik ari ili nengeri Raja Merom. Langkau sida menyanak mit, semina numbas endor sida tiga diau. Pendiau tudah sida tiga merinsa amat, suah ngelaong makai, laban nadai utai diempa. Nya ti mun ke sida selalu bekuli ba orang bukai, ngiga pemakai.
“Enda pia Indai Duat,” ko Apai Aloi, “Saharitu aku deka ka pasar ngiga jereki.”
“Nama bansa jereki ti deka digiga nuan deh Apai Duat? Gamal ke baka nuan nya, anang arap ke diri bulih utai. Indah orang ke pama agi pendiau ari kitai pedis tulih ke jereki.” Ko Indai Duat.
Apai Aloi enda peduli ke jako bini iya Enchelegit. Iya lalu nurun bejalai ke pasar. Nyau kepuas iya ke bejalai kia-kia sebelah pasar ngiga jereki, enda ga bulih utai ti ko ati. Ensepi diri bakanya, iya pan lalu mulai ke diri. Nyadi leboh iya pulai ba rantu jalai, dia iya endang enda ngetu merening kia kia, nyangka bisi utai orang berayan sebelah jalai nya dia. Nyau kepuas iya ti malik ke kiba malik ke kanan, nya baru iya tepeda ke puchong puang siti, garing-garing ba tisi jalai. Puchong nya lalu diambi iya, sereta lalu dibai iya pulai ke langkau.
Datai dilangkau. “Nyah! Apai Duat, bisi bulih jereki nuan tadi?” ko Indai Aloi nanya iya.
“Bulih, peda nuan jereki aku tu.” Ko iya mandang ke puchong puang ngagai Indai Duat. “Keba nuan tambap,” ko Indai Aloi, “Lain jereki ulih orang, lain ga jereki ulih nuan.” Ninga anu Indai Aloi, iya enda bemunyi. Nurun iya ketanah lalu ditekong-tekong iya burit puchong nya tadi, peda lalu pechah. Udah burit nya pechah lalu diansah iya enggau batu ba senentang ti tajam. Udah nya lalu disimpan iya dalam raga sandik iya.
Pagi siti, leboh orang benong maioh mansa jalai enda jauh ari langkau sida tiga menyanak, dia Apai Aloi bediri ba tisi jalai, lalu nerupong utai ngena puchong nya. Terupong iya ka kiba, terupong iya ka kanan enggau puchong rumpong burit nya. Ngaga diri baka ke bisi utai digiga. Sekeda sida ti mansa bisi ngerara iya. Nama utai diterupong nuan enggau puchong rumpong burit nya, Apai Aloi?” ko sida nanya iya. “Apo! Kita berani-rani ngumbai tu puchong rumpong burit,” ko iya. “Enti kita nemu, tu batu terupong diberi antu ke aku?” ko Apai Aloi. “Enda meh kami nemu nya batu terupong diberi antu ke nuan deh. Nama utai diterupong nuan dia deh? Ko sida nanya Apai Aloi.
“Nya meh, dimalam manok sabong aku bansa chichas dichuri orang,” ko iya, “Aku nerupong tu deka ngiga endor bala penchuri ngelalai ke iya.” Ko iya baru.
Enda lama udah nya, “Nyin manok sabong aku dichuri orang,” ko iya. “Dilalai ke bala penchuri babaroh jangkar pun kara ke ari atas pasar.” Ko iya nunjok ngagai tunga pun kara. “Uji kami ga meda, enti amat bisi,” ko orang siko nganu iya. Disua ke Apai Aloi terupong nya ngagai sida. Terupong sida ngagai tunga pun kara ti ko iya, nadai ga sida tepeda ke manok dia.
“Nama kami nadai meda manok deh?” ko sida.
“Dini kita olih meda iya, kita ga apin sebulu enggau antu,” pia ko saut Apai Duat.
Ninga munyi nya, samoa sida ke bisi dia, sama deka enggau Apai Aloi ngabas manok sabong iya ke dichuri orang, ko jako iya ditanchang ke orang baroh pun kara. Datai sida ba pun Kara, amat bisi ga manok dia, ditanchang ke orang ba urat kara. “Nyah! Peda kita,” ko iya, “Nyangka dikumbai kita bula aku. Kedudi hari ila anang orang ngumbai diri deka ngenchuri utai aku, kini-kini pan orang ngelalai ka utai aku, temu aku meh. Kita apin nemu bulu aku. Apai Duat tu!” ko iya nyerigang ka diri dia.
“Enti pia, tau meh nuan nujum orang ngenchuri utai,” ko orang nganu iya. “Nya enda tusah akan,” ko iya. “Tak barang maia utai kita nyau tau ke dichuri orang, padah aja ngagai aku, awak ke aku nujum iya.”
Udah nya Apai Aloi lalu mupok mulai ke diri ngagai langkau sida menyanak. Sida ti bisi enggau iya dia tadi lalu nyau mega majak ke pejalai diri. Serantu jalai sida berandau ke pengawa Apai Aloi ke tau nyadi Tukang Tujum. Lalu pia mega, sida lalu nusoi pengawa Apai Aloi ngagai orang bukai ti bisi enggau sida betemu.
Kira dua tiga minggu udah bekau nya tadi, bisi siko orang ke diau tunga ka ulu langkau sida bisi serabana ke diri nyau kambin sapuloh iko. Kambin ke nyau tu tadi dijangka ke udah kena churi orang. Seninjik bendar sida ti udah enggau Apai Aloi ngambi manok ke di churi orang lalu madah ngagai orang ke empu kambin.
“Anang tusah kita,” ko sida. “Enti kambin kita dichuri orang, uji padah ke Apai Aloi. Iya pandai amat nerupong sereta nujom utai lenyau,” ko sida.
Ninga berita nya orang ke empu kambin pan lalu madah ke Apai Aloi, ngasoh iya ngiga kambin sida ke lenyau dichuri orang. Nyadi Apai Aloi pan lalu nyanggup diri nulong sida ngiga kambin ti lenyau ngena jalai penemu baru iya, nujum ngena puchong rumpong burit.
“Upah aku ngiga utai kita ke lenyau, enti aku tetemu,” ko Apai Aloi, “Siko kambin tiga ringgit upah. Enti sapuloh iko Kambin temu magang tiga puloh ringgit upah,” ko iya. “Enti kita besetuju ke upah nya, nyadi meh aku ngiga,” ko iya. “Enti kita enda besetuju, enda mega aku nyadi nerupong.” Ko iya nganu orang ke empu kambin.
Nya alai saut orang ke empu kambin madah ke diri setuju engau upah, nyampau ti dipinta Apai Aloi nya tadi.
Ninga saut orang ke empu kambin udah setuju, dia Apai Aloi lalu brangkat ngadu ke gaya diri malik ngagai matahari idup, udahnya mutar ngagai matahari mati. Mulut kulap-kulap bejako enda tentu didinga. Udah nya baru iya ngedar ka puchong rumpong barit iya dia. Terupong kia, terupong kia nadai ga dipeda kambin ke lenyau. Nyau kelama baru iya nuju ke terupong iya ngagai Pulau Pendam Iban, dinga tak lalu manjong iya. “Apo! Nyin bala kambin kita, ditanchang ke orang ba tisi Pendam Iban muak ari ili. Nasit bendar apin ditaban ka orang jauh,” ko iya.
Udah nya, sida pan sama lalu ngabas ngagai Pendam ti ko iya. Datai din, peda sida amat, tak nyau tekasak bala kambin sepuloh iko ditanchang ka orang ba anak kayu sebelah nya dia ba tisi pendam. Gaga meh orang ke empu kambin meda bala kambin udah temu. Sida lalu nyua ke upah ti udah disemaia sida enggau Apai Duat. Sida lalu pulai mai kambin, lalu Apai Aloi pan pulai ga ngagai langkau sida menyanak.
Iya ke pulai tu, kenu ko leka ensera tak nyau bedindang saying sarantu jalai gaga ke diri udah bulih duit ngemaioh nya. Datai iya dilangkau. “Nyah! Peda nuan Enchelegit nangga langit, Enchelegi nangga ari. Peda nuan Indai Duat, Indai Digat,” ko iya. Nuan suba ngumbai aku tambap, ngumbai aku lap, meda aku bulih jereki lain ari enggi orang. Enti nyau suah agi ila tentu kaya kitai menyanak,” ko iya bejako enggau Enchelegit. Indai Aloi enda bermunyi ninga iya.
Nya meh gaya pengawa Apai Aloi ngiga pengidup ke sida menyanak. Udah lepas pengawa tu tadi, agi suah iya diasoh orang ngiga utai lenyau. Samoa utai orang ke lenyau pan nadai enda temu iya magang. Pia mega pengidup tudah sida menyanak bisi bendar insur. Samoa bala penchuri endang nyau takut bendar ke Apai Aloi.
Tang kitai, lebih agi kita ke nembiak anang saru ka pengawa Apai Aloi ti bakanya, laban leboh malam hari iya ngenchuri utai orang, lalu dilalai ka iya di sebelah daun, sebelah kampong enggau sebarang endor bukai. Iya ngelalai ke utai orang ke dichuri iya awak ke nyamai ditujum iya ngena diterupong iya enggau puchong rumpong burit. Udah nya leboh orang ngasoh iya nerupong, dini iya enda nemu endor, ga iya empu ke ngenchuri lalu ngelali ke utai nya.
Nyau kelama udah lepas pengawa tu tadi, dia deh bisi siko Raja diau di nergeri ti jauh ari menoa Raja Merom. Raja nya lenyau tinchin. Iya sayau amat ke tinchin iya nya, laban tinchin nya bemata ka gemala. Ari tinchin nya meh terubah peturun iya nyadi Raja. Tinchin nya nyadi ke pesaka peturun Raja.
Udah tinchin nyau lenyau dichuri orang, dia Raja enda ngetu ngiga orang ke pandai tenong. Bala beliau enggau manang sama-sama udah nguji mai batu tenong, batu karas dikena sida nujom orang ke ngenchuri tinchin Raja nya tadi. Siko pan ari samoa sida nya tadi nadai udah tetemu ke tinchin nya.
Nyau kelama Raja nya ninga orang betusoi ke siko orang di negeri Raja Merom pandai amat ngiga utai orang nyau.
Ninga nya Raja lalu ngasoh Jeragan kapal dua iko besedia ngena kapal iya ke pemadu besai belayar ngagai nengri Raja Merom ngambi Beliau Apai Aloi laban Apai Aloi tu ko berita landik nujum.
Raja nya nyau udah ringat bendar meda tinchin iya lalu enda temu. Nya kebuah iya ngasoh jeragan dua iko nya, enda tau enda mai Apai Aloi datai ngagai Astana Raja. Enti iya deka enggau, lalu datai ba Astana Raja iya enda tetemu ke tinching nya, iya mega deka dibunuh. Tang enti iya mujor lalu tetemu ke tinchin nya Raja deka meri iya kapal besai sebuah sereta diisi enggau barang sepemenoh kapal nya ke upah iya.
Jeragan dua iko nya pan lalu besikap ngerah bala kelasi seduai mai sida angkat belayar ngagai menoa Raja Merom. Datai din, serta udah belaboh ba pengkalan pasar, sida lalu bedarat enda jauh nuju langkau Apai Aloi ti ari ili pasar. Sida Apai Aloi lalu tekenyit meda nala temuai ti enda dikelala tak niki rumah sida menyanak. Enda nganti Apai Aloi nanya ke penemuai sida lalu nusoi kabuah diri ti diasoh Tuan Raja ngambi iya nujum tinchin Raja ti udah nyau.
Ninga munyi nya tusah deh ati Apai Aloi. Iya madah ke diri enda olih enggau. Ninga saut iya munyi nya lalu deka dibunuh bala Jeragan ga iya. “Tu parai aku Indai Duat dibunuh orang tu. Aku madah ke diri enda olih enggau sida, deka dipasong sereta lalu dibuai ka ai ga aku. Enggau aku lagi, enti aku enda tetemu ka Tinchin Raja, deka dibunuh Raja ga aku. Dini alai aku tau idup deh?” ko Apai Aloi. “Kasih meh nuan Apai Duat, Apai Digat, dibunuh orang. Sapa ke nupi, sapa ke nengkani, sapa orang ngidup ke kami dua menyanak ditinggal ka nuan parai enggau orang ke gensarai redak tanchang? Keba aku ngerara nuan suba, enda ngasoh nuan ngereja pengawa maioh macham. Nuan enda beduli ka jako tagang aku.” Ko Indai Aloi.
Udah nya Apai Aloi lalu bejako kediri enggau Indai Aloi. “Aku diatu tulih ke runding siti, enti kapal ke dikena aku nyau nadai dipeda ari tebing, dia seduai Aloi lalu nunu langkau kitai tu. Ari kapal aku lalu ngaga diri nerupong tunga kitu. Aku madah ke langkau kitai angus, tentu sida deka dibai aku nikal, lalu enda nyadi enggau sida,’ ko iya.
Udah nya nyau meh Apai Aloi belayar dibai Jeragan kapal nuju negeri sida. Iya nyau nadai dipeda agi tebing, dia Apai Aloi ngaga diri nerupong ke tebing. “Apo! Parai meh bini anak aku din Jeragan.” Ko iya. “Peda nya langkau kami menyanak udah angus empa api. Tu enda tau enda nikal kitai Jeragan,” ko iya.
Ninga munyi nya lalu diputar ke Jeragan kapal sida, serta lalu nikal baru ngagai negeri Raja Merom ngabas pengamat jako Apai Aloi. Datai ditebing, peda sida Jeragan amat langkau sida udah retong empa api. Apai Aloi lalu madah ka diri enda nyadi enggau sida, laban nadai ngaga langkau ke sida menyanak.
Nyadi Jeragan enda olih disempia ke iya. Digerah Jeragan dua iko nya samoa bala kelasi ngasoh sida ngaga rumah ka Apai Aloi. Udah nya semoa ngaga nya magang meh bala sida neyengkaum Jeragan dua iko sama besaup niri ka rumah Apai Aloi baru. Nama deh pengelama kereja orang tubuh maioh. Dua hari lepas nya lalu tembu rumah digaga sida. Besai rumah Apai Aloi digaga bala Jeraga. Rumah ringkat dua. Semoa geladak papan magang, dinding papan, atap tebilian magang. Baroh rumah disemin magang. Rumah pan baru digaga sida. Nyau malu samoa orang ti diau bekelingi dalam negeri nya meda pemanah rumah Apai Aloi digaga bala kelasi.
Udah tembu rumah, dia Apai Aloi lalu dibai orang belayar baru. Nadai akal agi iya. Iya pan nyau tusah ati baru ngenang diri ti deka dibunuh Raja. “Manah, besai pan rumah ti kitai ke bempu lalu mati, nadai meh guna.” Ko ati iya dalam nyin.
Lemai siti kira pukul lima lemai, kena iya ngenyenang ka ati diri, dia iya dudok ba perabong kapal. Moa iya tunga ke luan. Iya ngaga diri nerupong-nerupng utai kiba-kanan. Terupong iya kia-kia. Nyau kelama iya ke main nya, dia iya tepeda ke burung Lang dua iko bebintih-bintih tinggi atas kapal dilangit din. Meda burung nya bebintih iya lalu bejako guot-guot kadiri.
“Enti enda ke burak, ke chelum ga alah. Enti enda ke chelum ke burak ga alah,” ko iya.
Iya ke bejako nya tadi betul-betul ari belakang Jeragan dua iko ke benong ngemudi ke kapal sida. Dia Jeragan siko ninga jako Apai Aloi, “Enti enda burak, chelum ga alah. Enti enda chelum burak ga alah.” Iya nyitol pangan iya enggau siko. “Dinga nuan,” ko iya.
Jeragan dua iko nya enda nemu Apai Aloi ke nerupng burung Lang dua iko ke bebintih. Nyadi bulu Lang siko chelum, lalu bulu siko burak, nya ke dirara iya, enti enda chelum burak ga alah. Pekaian Jeragan dua iko pan pia mega, siko ngena pekaian chelum, lalu siko ngena pakaian burak.
“Nyah! Dinga nuan, udah temu iya tua enchuri tinchin Raja. Manah tua minta ampun iya aja, enti enda, tentu tua parai dibunuh Raja,” pia ko jako Jeragan siko. “Amat nya. Manah tua meri tinchin nya ngagai Apai Aloi. Udah nya tua minta tulong iya anang ngasoh iya madah ke Raja tua ti udah enchuri tinchin,” ko saut siko ga.
Ninga seduai munyi nya tak lalu diputar ka Apai Aloi burit terupong iya ke nerupong nya nuju Jeragan dua iko nya, sereta lalu nyebut enggau nyawa ke inggar amat munyi tu. “Enti enda burak, chelum ga alah, enti enda chelum burak ga alah,” ko iya.
Ninga nya, nyau enda olih tat ke agi ati seduai laban ngumbai Apai Aloi udah nemu seduai ti enchuri tinchin Raja. Dia seduai lalu ngasoh Apai Aloi duduk ngimbai seduai, lalu bejako munyi tu. “Kami dua tu minta ampun serta minta tulong nua meh aya Beliau,” ko seduai. “Amat meh nuan tu pandai nerupong barang orang ke kena churi. Maioh beliau enggau manang udah ngiga orang ke enchuri tinchin Raja, tang siko pan nadai meh sida tetemu ke bagi orang ke enchuri. Nya amat kami dua tu meh ke enchuri tinchin. Nya alai kami dua mai nuan bepekat. Anang madah ke Raja enggai ka kami dua dibunoh iya,” pia ko Jeragan dua iko nya.
“Aku sigi nemu,” ko Apai Aloi. “Keba aku lembau dibai seduai betemu enggau Raja, laban aku nemu endang sigi seduai ke enchuri tinchin Raja. Diatu tak semadi seduai mai aku bepekat, nadai ko enggau meh. Kasih ka seduai enggai ke dibunuh Raja.” Ko iya.
Apai Aloi lalu ngajar Jeragan dua iko nya, ngasoh seduai iya ngelalai ka tinching nya. “Tanchang seduai tinchin nya enggau benang merah. Udah nya benang mirah nya tanchang ka ba urat kayu dalam pegong ari atas padang ba belakang Astana Raja. Atas pegong ke endaor seduai ngelalai ka tinchin gaga ke tanda,” ko Apai Aloi. Udah nya lantang meh ati Jeragan dua iko nemu diri enda dibunuh Raja, ninga Apai Aloi deka dibai bepekat.
Lemai siti, maia matapanas nyau ka padam sida pan datai ba negeri Raja ke nyau tinchin. Apai Aloi lalu melit ka sirat kanggan iya lalu mai terupong puchong rumpong burit. Raja endang udah nganti Apai Aloi ba penyangkai kapal. Datai dia, Apai Aloi lalu dibai Raja terus ngagai Astana.
Lemai nya udah tembu makai, maioh utai dikerandau enggau Tuan Raja. “Kati nuan deka ka langkau?” ko Tuan Raja nanya Apai Aloi. “Eh! Enggai aku Tuan Raja,” ko saut Apai Aloi, “besai langkau aku din. Ukai langkau agi nyau rumah tegap enggi aku nya dia.”
“Ukai rumah ko aku. Kati nuan deka ngirup arak chap langkau? Ko Raja nya nandu jako iya baru.
“Arak deka aku, nya endang utai di irup aku dimenoa kami din,” ko iya.
Tuan Raja lalu mai iya ngirup langkau mimit. Leboh Raja ngenang pasal tincin iya ke nyau, dia Apai Aloi enda ngasoh iya tusah ati. “Pagila aku nerupng tinchin nuan nya, iya tetap temu aku.” Ko iya.
Nambah ka nya, Raja madah ka Apai Aloi mega, enti iya enda tetemu ka tinchin nya, iya deka dibunuh. Enti iya udah tetemu ka tinchin nya, iya deka diberi Raja kapal besai sereta sarat di isi enggau reta tengkira. Udah nya laban nyau jauh malam sida lalu tindok.
Pagi siti udah sida dani, Apai Aloi lalu dibai Raja makai pagi. Udah badu makai, Apai Aloi lalu pansut ngagai luar Astana, lalu ngaga diri nerupong kia, nerupong kia. Tuju iya katas, tuju ka iya kebaroh ke terupong iya. Nyau ke lama udah nya baru nerupong tunga ngagai pegong ke ari atas padang Astana Raja. Tuan raja seruran baka buah kundong mata empa pemedis ati iya meda tinchin lalu nadai temu, endang ati deka munuh Apai Aloi gamal iya.
“Oh! Ampun Tuanku, anang tusah nuan! Nyin tinchin nuan dilalai ke penchuri dalam pegong datas din, sereta ditanchang ke ngena benang mirah ba urat kayu dalam pegong,” ko Apai Aloi.
Ninga munyi nya Raja lalu mai Apai Aloi enggau bala iya bejalai beguai-guai ngagai pegong. Datai dia, “Nuan ngumbai tinchin aku dilalai ka penchuri dalam pegong tu, ni senentang iya ditanchang ka penchuri dalam ai din?” ko Raja nanya Apai Aloi. Leboh ke bediri ba tisau pegong, Apai Aloi endang udah meda tanda ke digaga Jeragan.
“Tu senentang iya Tuan Raja, Asoh soldadu nuan nyelam iya bejimat-jimat enggai ke kena indik sida. Utai nya alus,” ko iya.
Siko soldadu lalu diasoh Raja nyelam. Digama iya begadai-gadai dalam ai, sepi iya amat utai asai tinchin kena sagam iya ditanchang ke enggau benang mirah dalam ai din. Dibuka soldadu begadai-gadai tali benang mirah. Udah nya baru iya mai pansut. Peda tak amat tinchin Raja ke nyau sereta ditanchang ngena benang mirah munyi ko Apai Aloi.
Nyangka tak enda brasai agi, lalu manjong Raja meda tinchin iya udah temu. Enda nemu agi jako Tuan Raja nya muji Apai Aloi. Apai Aloi enda bemunyi dipuji Tuan Raja, samina naka tuchom tekura. Raja pan enda ga bula ke samaia lalu di isi iya kapal besai sebuah enggau reta tengkira enggau macham pesaka ke lama-lama, ke mana-manah. Pia mega pamaioh duit diberi Tuan Raja nyau sarat kapal.
Raja lalu ngasoh Jeragan enggau kelasi nganjong Apai Aloi pulai ka menoa iya empu ba negeri Raja Merom.
Datai ba menoa diri, dia Aloi seduai indai iya Enchelegit Nangga Langit, Enchelegi nangga ari nyau tekenyit meda reta tengkira, duit moa pemaioh enggau kapal sebuah ke ulih Apai Aloi. “Enda sangka aku Apai Duat, Apai Digat ke utai tau nyadi baka tu. Dikumbai kami duai Aloi mati nuan ngelamatu. Tiap hari kami duai Aloi nyabak ke nuan. Enda nemu nya nuan pulai mai keresa tengkira ngemaioh tu,” ko Indai Aloi. Enda tentu tindok sida menyanak malam nya berunding ka pengereja diri baka nya.
Tumu pagi hari siti Apai Aloi ngambi terupong puchong rumpong burit lalu dipechah ka iya. Udah nya ditunu iya ba api. “Nuan tu ke nyau ka mai aku mati ngelamatu. Nuan tu udah aku tunu. Badu meh orang ngambi aku nerupong barang orang ke kena churi. Diatu aku nyau udah kaya. Manah agi ti kami duai Aloi jadi Jeragan bejalai ke kapal.
____________________________________________________________________

Naka tok dulu cherita Aloi sebilik….